撇（phe7）車

撇（phe7）車 陳玉華 97/11/14



火車6:45分吱吱叫，各位旅客往蘇澳的火車欲開囉請上車，鳴-------- 鳴--------鳴--------嘁磅---嘁磅---火車起行囉，置出口的所在，看見細漢查某佮其他的同學雄雄狂狂蹝倒出，上氣接勿會著後氣，喘phi5phe7講：「阿母我火車做無對，7：3 0愛到學校，今仔日愛升旗，若遲到，我著愛徛頭前面對眾人，我會感覺足見笑，汝今嘛騎機車載我去蘇水學校」，啥乜？唔閣我今仔日有課，8：50愛去到山頂粗坑呢，欲按怎？閣勿會凍將查某囝撣咧無管，只好頭編予an5撇（phe7）車 ， 乖查某囝，做予好，手tau予an5，阿母欲開車囉，sng5（引擎聲）----像嘖射機仝款，3分鐘唯車站已經來到宜興佮復興的雙叉路口，經過平交道，一ling5一ling5慢慢騎，路過果菜市場口。透早出來買菜的阿公仔、阿婆仔挨挨陣陣，閣有趕欲上課的囡仔兄、囡仔姊，一路上tshu2tsie2停tsie2 tshu2tsie2停tsie2，我是插翅難飛，像龜咧趇仝款徒勿會振動，心肝活欲急死，來到黎明國小的十字路口拄好青紅燈dong3恬，古錐的囡仔兄騎一台孔明車擋置阮的頭前，青燈熠，我著衝，路彎我著彎，倚快車道的路邊停一台瓦斯車，送瓦斯的歐里桑唯早餐店行出來，看我衝過來dang5停店路中央唔敢振動，早餐店內的人逐個喙仔開開，目睭大大蕊，真驚惶，好加在，我目勢好反應緊，擋仔握an5雙跤tshe5塗跤鬥擋，一雙布鞋磨到強欲破，歐里桑，我抑有責任呢，汝嘛卡拜託咧。

撇（phe7）車 ，一輪50兩 輪100是少年家仔的專科，撇（phe7）車若欲平安，除了技術好也愛靠運氣。我這個老查某，今仔日不得已，面皮激厚厚，hoo3出去，查某囝的生死交置我的手裡，勿會凍大意，安全較重要，閣經過壯圍國小，車輛著愈來愈少，路面廣寬，沿路經過一大片的草青，景色優美，遮就是哈密瓜的故鄉，茲故是冬天，熱天的時，置這個所在的路邊，著會凍看著耕稼的人，搭一個棚架仔，內面排滿瓜果自產自銷，一想到熱天，心頭著足甜。

我像海鳥插翅而飛，飛過貓里霧罕橋，清爽的空氣，溪水清青，草枝青翠，遮接近溪口水鳥保護區，冬天著會有水鳥飛來飛去。閣再向前飛，飛過葛瑪蘭橋，一片白茫茫的蘆葦草隨風飄揚。一路經過大橋佮小橋，經過最有文化氣質的傳藝中心，經過魚食品廠，著會鼻著一陣一陣的魚腥味。經過一大片的thiong2仔埔地，心內難免ge 5 g e5。進入蘭陽隧道，雖然車燈已扑開，唔閣我猶原感覺黑陰暗地kam2講是----外口日光的關係，來到學校門口拄7：49分。

卡輸我若踅翻頭去上班，有可能會遲到，是欲往冬山、羅東、葫蘆堵大橋，即tsaN3對員山仔，抑是直接往冬山、羅東，即tsaN3對三星，經過三星市區，天送埤，經過泰雅大橋，來到大同國小，著會凍看著泰雅的勇士雕刻，佮野生動物雕刻，經過吵雜的平地，經過肅靜的山領，8：50我一路平安來到化育，可是我鳥sim3 sim3的長頭毛，強欲變成雜草，我趕緊梳妝行入教室，學生囡仔已經提好課本咧等我。