學生演講稿---------------我上佮意的電視節目

我上佮意的電視節目 撰稿：黃揆媛99/06/27
修稿：陳玉華99/06/27
各位評判老師、各位來賓逐家好，我今仔日欲演講的題目是『我上佮意的電視節目』，『我上佮意的電視節目』。
現代電視是家家戶戶中，不可缺少的電器用品，色彩有夠姷，街頭巷尾滿滿是無稀奇，一台電視有幾落百個的節目頻道，節目時間是24小時置做，在汝選擇，看是阿公愛看的布袋戲，抑是阿媽愛看的歌仔戲，只要提著電視搖控器，手壓選台號碼，著會凍轉著汝愛看的電視節目。無像古早農業時代，有電影真稀罕，一個庄頭幾落百戶，才有兩三台黑色的電視，頻道才三個，中視、台視、華視，節目時間閣分早起、中晝、暗時三個時段，其它的時間電視攏咧炒豆仔無影目。電視節目時間若到，有黑白電視的厝裡，廳頭是塞甲密tsiu2 tsiu2 ， tsat thong2 thong2，厝邊隔壁無論是大人抑是囡仔，隨人帶椅頭仔過來，逐個圍咧看電視，鬧熱滾滾，電視做煞隨人又閣將椅頭仔夯走，轉去做穡，無閒tshih tshih 。

現代的我，店置厝裡，無穡頭通做，閒時無聊的時，我頭一個所想著的，著是----趕緊扑開電視選台。置靴濟多元的頻道中，汝甘知我最甲意啥乜節目呢?我共恁講，我最甲意看的著是「海綿寶寶」卡通節目。它是一部有點好笑的，又閣富教育娛樂的節目。置茲部「海綿寶寶」卡通節目裡，予我印象最介深刻的一段劇情，是描寫智慧財產權的問題，蟹老闆經營一間餐廳，伊發明了一種口感很特別的漢堡，海綿寶寶是這間餐廳的總鋪師，「頭家一個比，辛勞做半死」，海綿寶寶每工真辛苦咧煮食，但是伊真認份，做出來的食物，非常受人客的喜愛，餐廳的人客時常客滿。皮老闆是另外一間餐廳的頭家，店裡攏無人客，為了取得蟹老闆的獨家秘方，皮老闆『歹心黑轆肚』，時常用各種不好的手段來陷害，『押雞孵卵了憨工』攏無成功。

海綿寶寶佮派大星是一對患難兄弟，有『福同亨有難同當』，個性也攏非常正值，為了維護餐廳的名聲，力抗皮老闆的各種計謀，時常鬧笑話，唯海綿寶寶的劇情中，我得到袂少做人處世的態度，『害人之心不可有，防人之心不可無』，以及學到面對困難時，欲按怎解決問題。希望大家會凍佮我仝款來收看，「海綿寶寶」卡通節目，増加智慧。我的演講到遮，多謝逐家。
（字829）