糊塗个裁縫師

液種台語社通訊第二十四期 1999年5月

糊塗个裁縫師 陳玉華稿

入秋矣，天氣漸漸冷，宜蘭个雨水特別厚，自做大水到今（tann），得卜兩個月矣，橫直我裁縫嘛學透矣，厝內嘛有一大堆布節仔，來揣幾塊仔冬天个布，做幾領衫仔褲予囡仔穿。這塊烏too3 紅个卡大塊，著做予妙玲，益這塊烏个布料，著做予奇（ting7）穿，益閣有這塊卡無三尺長，才來做予巧宜穿，我个人生已經過一半矣，這塊青（tshenn）色的是頂工學裁縫偆个布，拄好做一領西裝予家已穿。我頂半世人，攏是抾人穿過个衫，這馬出師矣，替家己揀一塊布，做來穿嘛是應該个。錦賢毋免做，伊个衫仔褲上儕，大兄、大姊做小賣个時，偆落來个S號，伊攏真合軀，伊个衫仔櫥，攏強卜貯袂落去矣.



　 趁這久攏無人來攪吵个時，緊來畫板仔（pan5 a2），尺量量比比咧，直个、彎个、角个攏無增差，嗯！看起來，範仔閣畫了袂（bai2），益閣來著是ho5範仔（pan5 a2），中心點，la2 juh4（褶份）。腹肚邊、山、手空、前片、後片、褲袋仔形攏僬（ciau5）無問題，褲柱、褲底、尻川斗、褲頭，本布个部份攏ho5好矣，閣來著是畫內裡範仔，前片个分做前袖、腹肚邊四片、後壁一片，手四片，著萬事OK。鉸刀舉來著剪，一塊長長个布，予我共分屍做一節（tsak4）一節，有大有細，西裝个初步，我已經完成矣，閣來著是熨佮合(kap4)起來。


　 講著熨，煞袂記得鉸sin2（內襯），厝內嘛拄好無sin2，oo too2 bai2（機車）騎咧，去湯仔城（礁溪溫泉、市場）鈕仔店liam2（買），好佳哉來回免半點鐘，轉（duinn2）來我仝款將sin2共分屍，順紲將熨斗插予燒，著趕緊緞(tng3)sin2。緞sin2个時才發現本布个後壁煞破一穿(chng)，注死毋死閣誠明顯，夭壽！卜按怎，偆个布節仔毋知有夠無？老矣！目睭霧矣。比比咧，煞真正無夠，今（tann）是卜按怎？下頦托咧，緊想看有辦法無。坐卜半點鐘久，無法度矣歸氣做變形个西裝，後壁片本來三片，這久鉸做四片，將錯就錯。sin2緞好著坐落來車，那車那反爿（ping2）過來巡，手空煞食袂入腹，啥原因咧？原底愛扑缺（khih4）做號，煞袂記得，嘛袂記得糾襇(kiu king2)。做卜好个時，心肝底暗暗仔有一種成就感。做好反爿(ping2 ping5)看，衫仔裾个內裡煞蹋（tham5）倒落（luai7）。原來本布下跤裾若加一寸，內裡著愛減一寸。閣拆起來改，改好試穿，閣袂輸敢那訂做个，誠好看。

　閣來講到外套。會記得熱天去海邊仔，佇停車場个附近，有一間外銷成衣廠（tshiang2），工場个門口有一包無卜挃（tih8）个鋪棉布節仔，我有共揀幾塊仔卡大塊个轉來，這久拄用會著，著共鉸兩領外套，寢頭仔範仔合囡仔身拄好，啥知穿佇身軀（hun su）煞袂振袂動，奇 講：「大姊佮小妹个手箍像機器人仝款，碇桄桄(ting7 kong2 kong2 )袂彎曲，誠好笑」。查某囡仔面臭臭，喙仔翹翹，我共衫拆開，內裡个手才改用薄裡，我吩咐我家己，後擺手仔若卜做厚裡个，著愛會記得手空量卡大咧。

　閣來著是做予奇 个長褲，褲跤卜做倒pih4拗（au2），煞袂記去留緮(poo5)，揣無仝色布，歸氣鉸一塊布來插色嘛袂看。

　錦賢笑我頇顢閣想卜家己創業。老師用30年个經驗徛踮台頂，益我用一個月个時間，徛佇台跤認真做學生，聽甲耳仔仆仆，閣用二十冬个經驗嘛無法度來達成效果。急性、緊張、無點陳tin5是我上大个敵人。我是卜按怎來克服咧！睏予飽，精神爽，慢慢來研究。


　 暗頭仔，阿蘭來扑門，提幾領大人个衫仔褲，愛我改予伊个嬰仔穿，物件囥（khng3）咧，講伊卜轉去煮飯（tsi2 puinn7），我嘛講我益未煮咧，我想著大伯仔賣偆个四領囡仔褲，著去倉庫hiannh4出來，準備等一下仔伊來通予伊。綴（tue3）跤身阿蘭个大（tua3）家仔佮小姑moh4一包衫來，愛我馬上替伊修改，趕趕tshih4 tshih4像咧扑火，這陣錦賢拄好轉來，講盈暗廟口有一場西田社搬个布袋戲，愛我緊去煮飯來食，通赴時間，益母仔囝就按呢佮衫歸包閣moh4轉去。




　 來到廟口，時間夭早，毋閣來个人已經袂少矣，卡無拄好个著是歸暗攏咧落雨。十外冬前我捌看過西田社个布袋戲，嘛捌參觀過个戲翁仔，今仔日這齣戲是演好鼻師，戲翁仔師个手骨真猛掠，共布袋戲翁仔弄甲活跳跳，尤其是相扑个動作。是按怎戲翁仔師个，有法度共弄甲遐呢仔有靈性，是毋是捌失手過？我相信應該嘛有失手過才著，上重要个是愛知影按怎去改進佮研究。我想做裁縫道理應該嘛是仝款。轉來了後，我著寬寬（khua khua）仔量，寬寬仔比，雖然是義務个，嘛袂使有失覺察才著，我想人毋管做佗一途，攏卡點ting5咧才會出頭.


液種台語社通訊第二十四期 1999年5月