放學了後

放學了後 陳玉華96/07/30 撰稿





放學了後教室真吵，有講話的聲，有冤家相扑一句來一句去的聲，嘛有撟冊桌仔佮撟椅仔的聲，逐家比腳畫手吵吵鬧鬧，吵甲厝蓋強欲夯去，著愛老師一直催一直喝，逐家才甘願冊揹仔揹咧出去門口排隊。辦公室的風送頭喝著：「某某路隊唯厝的路線向前行。」「某某路隊唯厝的路線向前行。」阮的隊長喊一聲行，我著含阿姊 小弟手牽手，一直走，一直走，走到阮兜巷仔口，看著一隻大黑狗，伊煞一直吠一宜哮，哎喲 ! 害阮驚甲拋輪斗，起腳走轉阮兜門腳口。

阮伸手給大門推開，冊揹仔ㄏㄧㄚㄝㄏㄧㄚㄝ做一堆，坐店膨椅腳骨一直捶，目睭閣激予瞇瞇。唉 ! 誠累。坐店客廳，聽著灶腳傳來一陣一陣炒菜的煎匙聲，阿媽煮飯炒菜是用火ㄏㄧㄚ5，ㄏㄧㄚ5出飯菜一大鼎，口味有酸有甜有苦有辣有鹹閣有汫。予阮鼻著芳芳辣辣，腳步徒開一步一步慢慢ㄌㄧㄚㄇ，ㄌㄧㄚㄇ到灶腳喝一聲：「阿媽啊，阮轉來啊」。這時，阮阿媽心肝掣一下，罵講：「夭壽死囡仔，夭壽死囡仔，入來無聲無息，喝靴大聲欲ㄋㄧ5，予阿媽驚一下，儂講：「人驚人是會驚死人，是會無藥醫」，阮緊給阿媽會失禮：「阿媽我後擺唔敢啦」。阿媽：「哼-------抑閣有後擺」，阮講：「唔是啦，唔是啦，我是講我以後勿會閣按呢啦」，阿媽：「乖孫e，恁腹肚餓勿會」。鼻著芳味，我是餓甲腹肚咕嚕咕嚕叫，大腸告小腸，我忍勿會稠，趁阿媽無看，偷偷啊ㄋㄧ一喙塞喙空。後來我著先去洗溫軀，等阿爸阿母下班倒轉來。

盈暗真豐派，魚肉擺甲歸桌頂，阿媽講：「食魚食肉也著愛菜夾，囡仔儂袂凍撿食，除了食魚肉也愛食蔬菜才有營養」。看著桌頂芳貢貢的飯菜，我的腹肚實在太餓囉，擋勿會稠我三喙做二喙ㄅㄟ，湖甲滿面全飯籽仔，逐家看甲哈哈笑，阿公笑我ㄗㄚ便當，阿媽講：「飯逗逗仔食，才勿會食緊弄破碗」。閣一時仔久，噹-----噹------，有儂敲電話來啊，我碗箸囥咧，走去聽，是阮同學敲電話來，我著佮伊會一晡，阿媽講：「長話短講，食飯是皇帝大，唔通店靴咧扑ㄌㄚ涼，水蛙歕風是殺無肉」。

放學了後真輕鬆，食飯聽阿媽講台灣俗語，學一寡做人的道理，享受天倫之樂。阿媽講：「食果子拜樹頭，食米飯敬鋤頭，這是咱做人基本的道理，儂愛會曉飲水思源」。飯後，阿母泡茶予阮好潤喉，序大講天講地塊破豆，認真扑拚的人會出頭，光宗耀祖財富到咱兜.