礁溪二龍船競渡

DSCN6752.MOVDSCN6760.MOV

湠根母語文刊 第七期

礁溪二龍船競渡 陳玉華 作 91/04/30

比賽丌辦法真-----特殊,無記分，無發令，嘛無裁判，干礁由雙方家己鳴鑼做決定。若一爿己經摃鑼扒開，另外一爿毋肯摃鑼，若安呢著閣扒倒轉來起點，重新開始，著算講己經來回幾落擺，嘛仝款無一個結果，它丌輸贏攏是由觀眾佮隊員家己來認定丌。比賽丌時所有丌隊員，攏愛以跪咧丌姿勢來扒，隊員會凍相輪上陣，茲個活動雖然號名做『扒龍船』，毋閣，它有船身卻無龍頭，嘛是佮一般龍船無相仝丌所在。

茲種民俗活動流傳二百外冬矣，是文化上最介寶貴丌一個資產。它是按怎傳落來唉，己經無儂會凍明確來共它講出來，根據二龍村丌長輩，憑著過去丌記憶，佇代代相傳之間，有講著『二龍扒龍船』丌由來，是起源佇二百外冬前，噶瑪蘭平埔族人丌一種活動。相傅早期丌噶瑪蘭平埔族，佇二龍河沿岸丌『淇武蘭』定居了後，因為滄海桑田丌海岸，向東退去幾落里遠，河沙堆積丌結果，又閣佇河丌下游，造就了一大片丌新土地稱為『洲仔尾』，漢人遷徙入地丌時，噶瑪蘭平埔族，每年著己經佮上游『番割田』丌族人，做定期扒龍船比賽。


最早期丌比賽是用駁仔船。著是當年佇二龍河上來來往往丌駁仔船（它是用木板拼成，靠人力扒動兮一種交通工具），或者是運載貨物丌紅頭船仔，噶瑪蘭平埔族扒船比賽丌目的，主要是運動佮消遣。因為當時店佇『淇武蘭』丌平埔族人，比『番割田』丌族人較少，定定扒輸，後來遷徙入來『淇武蘭』丌漢人，著加入去淇武蘭隊參賽，戰況即漸漸來改進，了後『淇武蘭』丌港水漸漸消徹，比賽丌地點袛好徒對下游去，原先『番割田』佮『淇武蘭』平埔族之間丌龍船競賽，著演變成『淇武蘭』佮『洲仔尾』仝庄頭之間丌比賽囉。

佇二龍河丌淇武蘭港裡，這過去丌二百外冬，天公伯仔曾經賜予居民生機，同時嘛一再奪走怹丌生命。因為佇日常生活中，淇武蘭丌居民佮二龍河丌關係密切，唯生活飲水開始佫甲洗衫、掠魚、交通、灌溉等-----，攏含二龍河撥袂離。定定有查某儂佮囡仔，跋落水丌事件發生，著安呢引起居民丌不安，村民攏認為港中有歹物仔咧作怪，河中丌魔神仔號做『老大公』。因此，茲庄丌村民造龍船來超渡，所用丌船隻，長差不多有十外尺，寬二公尺外，而且佇船隻丌船首、船尾、船柸等所在，攏畫了太極圖案，船首特別畫一對麒麟，以達佫鎮壓、避邪，求平安丌目的。

逐年若佫了舊曆四月，道由村長出面邀請頂頂下下庄內丌長老、紳士共同商議有關參賽丌事宜，平安旗丌製作，清理河道頂丌竹枝雜物等等丌空課。佫了五日節丌三五工前，即由主事丌鄰長，敲著大銅鑼，召集庄內漢草卡粗勇丌壯丁。選擇良辰吉日，燒香、燃炮由庄裡丌壯丁，唯龍船厝共龍船請出來，並且將龍船扛店佇大稻程，然後用藤條將一枝圓木龍骨，唯頭佫尾縛佇船身中心綑予稠，即免船隻佇出力扒動丌時失去平衡，完成擦油漆、縛骨、綑繩、架舵、插旗等空課了後，佇祭典會場（大稻埕），進行祭典儀式，折香淨舟點目睭。（咱頭拄才有講過，它是有船身卻無龍頭），所以必須愛店船首丌所在點一對目睭，佇村民丌么喝聲中，鳴鑼扑鼓、獻紙錢、鳴炮，並且仝齊共龍船扛向港邊落水，茲時，家家戶戶嘛用長椅條，虔誠備牲禮，店河邊祭拜『老大公』，經過一番丌過程了後，村人即會認為『龍神爺』真-----正附佇船頂。茲種風氣已經相傳二百外冬矣，是咱台灣最介有鄉土文化丌民俗活動。