台灣萬萬稅 -----------------學生演講稿

台灣萬萬稅 陳玉華 98/11/04

各位評審、各位來賓，大家好：我今仔日欲講的故事是『天佑台灣，稅稅平安』。『天佑台灣，稅稅平安』。
台語老師愛我寫一篇佮租稅有關的台語稿，我毋知啥乜是租稅？我問老師啥乜是租稅？老師講：『國家為了施政支出欲達成行政目的，依法強制向人民徵收的錢就是租稅，「取之於民，用之於民」，納稅是國民應盡兮義務佮權利』。
轉來厝裡，看阿媽提著一堆紙，優頭結面，憨神憨神坐店客廳，我踏向前問？阿媽汝是按怎？阿媽講：『乖孫仔汝看，茲疊是咱茲年度的稅金單，政府是欲搶人喔！一年稅金撿即重，領薪水也著納所得稅、繼承產業著納遺產稅、買車使用著納使用牌照稅、hap厝地著納啥乜契稅啦、地價稅啦、、房屋稅啦，賣厝的人著納，土地增值稅啦，一年稅金納袂了，台灣真正是萬萬稅』。
我將阿媽摟咧講：『阿媽放心啦，今仔日，阮老師有解釋講，遮稅金錢是暫時交予政府做管理，有錢好辦事，總有一工嘛是用置咱身上』，阿媽講：『按怎講？』，我講：『阿媽汝想看覓咧，假日的時，阿爸毋是定定駛車載咱去外縣市爽，』，阿媽：『是啊，是啊』，我講：『咱毋是愛經過雪山隧道、高速公路、橋墩、道路』，阿媽講：『是啊，是啊』，我講：『抑有咱宜蘭地區建設的公園仔、礁溪燒水溝、蘇澳冷泉、宜蘭文化中心、圖書館、市公所、鄉公所等等，或者是水災水患、風颱啦，須要重建修復，攏嘛須要一筆巨款，遮攏是政府向咱老百姓徵收稅金，所建設的公共設施，才會凍予咱享受，雖然講政府一年度向咱百姓，收取遮濟稅金，毋閣猶原用置咱的身上，所以啊，阿媽汝愛量早納稅金喔！才袂被政府罰款，抑是講平時啊，去店頭買物件，著愛主動索取發票，增加稅收建設好』，阿媽講：『是啊，是啊，大家若是會凍規規矩矩納稅金，才會凍創作咱社會福利，天佑台灣，稅稅平安』我的故事講到遮多謝大家。