學生演講稿--------------我佇學校的一工

撰稿：黃揆媛99/06/16
修稿：陳玉華99/06/21 我佇學校的一工 修改：：99/07/23

各位評判老師、各位來賓逐家好，我今仔日欲演講的題目是『我佇學校的一工』，『我佇學校的一工』。

每工透早天一光，雞一啼，我的目睭抑sa bui sa bui，著聽著阿母提衫架仔，店棉床邊敲甲大小聲，喊我起床，講：『日頭照尻川啊，抑咧睏』，茲的時陣，我面仔au3 tu7 tu7，喙翹tu7 tu7，阿媽講我：『喙唇挺好吊三斤豬肉』，我雙手一撥，趕緊洗手洗面準備到學校，一到學校，看著老師佮同學，我著講：『老師爻早、同學爻早』，行入去教室，我將冊揹仔囥咧，趕緊食早頓!!

上課的時，老師講：『身軀愛坐乎正正，才會得人庝』，我攏有乖乖坐正正、認真聽，聽老師的教導，因為我是班上的風紀股長，上課我毋敢假肖，我愛『以身作則』，假使同學上課若假鬼假怪，我攏會喊真大聲來共阻止，我是一個大喉嚨空，所以班的人攏叫我虎豹母。抑若是聽著下課丌鈴鍾仔聲，我叨像一尾蟲，囥店置尻川癢仝款，早著坐袂稠矣。阮庶囡仔親像『鳥仔放出籠仝款，嘩嘩叫，一人走一路』，我攏含朋友做伙耍「紅綠燈」，有夠刺激的!!中晝吃飯飽，我若不是去練習台語演講，著是含同學置運動埕耍，若是拄著毛毛的雨的天氣，我著徛店走廊的所在，欣賞半山腰的景致。朦朦的山，白白的雲霧，予我感覺『心、涼、脾、吐、開』。

小學四年級這個階段的我，無有課業上的壓力，所以我逐工攏是無要無緊，憨憨咧過日子，若是無聊的時，所想著的當然就是──耍，下課對我來講，是比上課閣卡重要，它不但會凍，予我丌目睭休睏、避免近視、恢復精神佮體力，閣會凍，予我活動筋骨。

我佇學校的一工，學校老師交待做的代誌，有時會出差錯，但是學校的老師，總是目睭展一蕊，kheh一蕊準拄好，毋但無共我計較，而且閣會時時刻刻來提醒我、引導我、鼓勵我。老師講：『仙人拍鼓有時錯，跤步踏差啥人無』，咱『做人著認真，做事著頂真』，只要有心改過著好，毋通『細孔毋補，大孔才叫苦』。放學了後我會去安親班，無閣我感覺置學校卡好耍！因為置學校會凍含朋友耍，培養感情，是我置學校的歡樂時光。雖然講置學校時間有誠長，我攏會曉利用時間來做寡代誌，袂予時間白白來消失去，所以我逐工攏過甲真充實。我閣卡希望每擺上課攏會凍快快樂樂！！我的演講到遮，多謝逐家。