荷蘭阿媽是我最尊敬的人

荷蘭阿媽是我最尊敬的人 陳玉華 98/11/15



我最尊敬的人著是我的阿媽，阿媽是民國前16年出生的，假使伊茲久若抑活置世間，今嘛差不多有114歲，可惜置伊90歲彼年，因為人無爽快，準備欲去看醫生，煞來跋一倒，著一命歸西，攏無予序世仔纏綴，實在是真好命。阿媽的出生地是置苗栗縣苑裡鎮房內里，阿媽是荷蘭佮客家的後代，因為家庭散赤，所以伊無綁跤，是一個大跤婆。苑裡鎮房內里的查某人，攏會曉編織藺草做大甲草帽，手藝真巧，後來因為阿祖再嫁，阿媽細漢的時，著綴阿祖綴橋後嫁來彰化福興騎溝仔，騎溝仔人做米粉為生，阿媽18歲彼年嫁予阿公做後續，阿公的前某過身，放下二男一女（大伯、二伯、大姑）的幼嬰，須要一個阿母照顧，媒人介紹，阿媽著嫁予做保正的阿公做後續，阿媽佮阿公結婚了後，著生阿爸、五叔、細漢叔三個查埔，查某三個，著是四姑、滿姑（細漢予人做新婦仔）、細漢姑。

阿媽平時攏會做寡大甲草帽，轉去苑裡鎮房內里交，賺淡薄仔錢做所費。阿媽的個性真溫柔，人嘛生做真嫷，人高大，目睭大大蕊，鼻仔靈靈靈，喙薄薄薄，耳仔大大的，面是雞卵圓，是一個大美女。阿媽對前人某所生的囝真疼惜，連前人媽的孫嘛疼入腹，若是有物件分配的時 ，前人囝第一優先，呀阿媽家己的親生兒著卡凊采，像講阿公過身了後分傢伙來講，阿媽將傢伙分做兩份，一份予大伯佮二伯分，另外一份是予阿爸、五叔佮細漢叔三人分，阿媽驚人講閒仔話，著算講家己食虧，嘛無愛予人講閒仔話。無像冊中所講的後續苦毒前人囝，因為阿媽對序世仔袂大細心，所以大姆、二姆佮叔伯兄姊，逐家攏真尊重阿媽，甚至厝邊兜嘛攏真尊重伊。

民國四十六年八~~九月左右，阿媽著去台北幫阿叔看頭看尾，有時袂放心庄跤的大細，著轉來大崙田洋仔帶幾工仔，即閣過去台北。會記得我三、四歲仔的時，毋知為著啥乜，一直哮，一直吵，阿媽著共我揹置尻脊，一直搖一直騙，叫我愛乖乖。我讀國中的時，有一工，阿媽提柴梳，叫我幫伊梳頭毛，我才發現阿媽，頭殼頂根本都春無幾枝毛，阿媽老啊，目睭嘛濁啊，面皮嘛皺啊，雖然講阿媽老啊，毋閣伊猶原注重打扮自己，伊講出門愛整齊才袂失禮。