我上佮意的電視節目---------------學生演講稿

我上佮意的電視節目 撰稿：林智傑99/06/06
修稿：陳玉華99/06/06
各位評判老師、各位來賓逐家好，我今仔日欲演講的題目是『我上佮意的電視節目』，『我上佮意的電視節目』。
我上佮意的電視節目，是頂港有名聲，下港有出名的『百萬小學堂』，『百萬小學堂』的來賓，來自無仝的領域，除了演藝界的藝人以外，閣有政府官員佮政治界人物，每一個來頭攏袂細，節目出題活潑，嘛造就一寡『明星小朋友』，這個節目的主持人是小燕老師，阮逐家攏叫伊燕仔。伊上佮意講「好，請按確定」，每擺答題的時，逐家攏喊出『ㄟ』的聲，『百萬小學堂』是一個益智性的節目，毋但會凍學著真濟智識，而且閣是一個真愛pinn笑的好節目。
『百萬小學堂』，它是阮全家伙仔每禮拜五的暗時，所必看的智識性的電視節目。只要是類似答題性的電視節目，我攏真佮意看，像茲種小學一到六年級的挑戰題，好親像只有『百萬小學堂』茲個節目，所以阮全家攏超級愛看，只要到五年級的題目，我的爸母著會提出紙墨筆，愛我回答作題，假使我若答對二題的話，阿爸佮阿母著會賞我一個文具組，抑若是答毋著，阿爸佮阿母，著會叫我愛入去房間練武功。
所以啊，若到禮拜五的暗時，我的心臟著呯蹦跳，因為啊，假使答題失敗，我著慘啊死定啊。其實置回答題的時，只要冷靜梢想際，三思而後行，加用頭腦，加思考，人講『一人主張， 毋值兩人思量』，含厝內底的人做伙共同討論，著會凍手牽手，心連心，共同渡過難關，俗語：『天下無難事，只怕有心人』，雖然講一時間答錯，毋閣置節目結束了後，阮仝款會閣做伙討論，俗語講：『失敗為成功之母』，所以失敗的時，袂凍失志，要勇往直前，加想加做，總有一工一定會成功。
自從我看『百萬小學堂』這個節目了後，我增加袂少的智慧，嘛加識真濟的代誌，我嘛真希望逐家會凍佮我仝款，利用禮拜五這個時間，歸家伙仔做伙來收看『百萬小學堂』這個益智性的節目，它毋但會凍幫助咱增加智識，而且閣會凍予咱歸家伙仔做伙跋感情，真正是『一兼二顧，摸蛤仔兼洗褲，蕃薯溝兼種芋』。我的演講到遮，多謝逐家。