放煙火

海翁台語文文學 第二期

放煙火　陳玉華稿 2001/02/14　　　　　　　

年節時仔，街仔路攏無儂，阮（guan2）一家伙（hue2）仔五个人，騎三台自輦車，準備卜去河濱公園放高射炮，佇路裡兩个爸仔囝，靠勢（si3）歸个車路攏無車，著開始表演特技，老父尻川（tshuinn）坐佇椅埾仔，跤勼起來虎骨頭，雙手即囥店手捍仔，控制轉踅，矣那奇 （ting7）即坐佇後架仔，雙腳蹋腳踏仔，一路歪來斜去嘻嘻哈哈，笑甲大細聲。

阮巡著河濱丌步道騎對河埔，即將自輦車站店邊仔，三个囡仔一儂摕一簇煙火（hue2），共高射炮一支一支插店塗底，了後一手掩耳一手用香點火，爆、爆、爆、爆、爆，一聲一聲丌炮仔聲響天邊，強強卜共天震破。有東時仔，火點落炮仔無彈去天頂，原在佇著啜<<<<>>>>爆，囡仔也驚也歡喜，顛倒阮驚共附近的嬰仔扑著驚。

拄頭仔天落毛毛仔雨，阮攏無插伊、後來雨煞愈落愈大，阮只好徙位，宓（bih4）店天橋跤閣再放，高射炮放完矣雨嘛停也矣，囡仔佮老父著店草埔仔偃來偃去。欲轉去丌時，老父著發動逐家，給草埔仔丌炮仔跤、報紙、竹林（phe3）仔，撿撿歸堆放火燒，當踞置火堆邊，共射炮跤一支一支囥入去火堆丌時，有丌抑未放過丌高射炮，煞爆一聲雄雄彈出來，乎逐家驚一趒，險閃未離，連岸邊丌釣魚儂嘛越過來看，有一擺經驗，逐家更加注心，聽著啜<<<<>>>>嗚一聲，逐家著驚甲走甲褲跤離，尤其是阮後生（se）惡儂無膽，走到岸邊。

看伊遠遠（huinn7 huinn7）掠一尾（be2）死丌垃圾魚，講伊卜烘魚仔，唔知垃圾魚一撣入去火堆，隨爆一聲無看影跡。阮每擺若行到水邊，攏會看著垃圾魚，乎釣魚儂釣起來撣置岸邊，它是外來種無天敵，專門食水底的爛屍體。咱政府嘛定定鼓勵咱愛來共消滅，只是一寡釣魚儂，魚仔釣釣咧，著唔知影通閣貯倒轉（tuinn2）去，無形間煞造成一種環境污染。

以前若放煙火干礁（kan ta）咻<<<<>>>>爆，咻<<<<>>>>爆，足單純，唔捌像茲擺即刺激閣緊張趣味。逐家攏耍甲足歡喜，會記得誠久，捌閣出現茲个畫面，望新正年頭有一個好氣象。