二寸釘

蓮蕉花台文雜誌（季刊）第十三期


二寸釘 陳玉華作2002/01/01

彼工阮（guan2）佮平常也仝款，歡歡喜喜三個囡仔，去羅東玲瓏踅，返頭經過宜蘭運動公園（huinn5），囡仔看著chhai7佇公園的火（hue2）車頭，就要求欲閣耍一時也。

看彼三個囡仔，peh上peh落耍到足歡喜的，連鞭徛佇鐵枝路撿石頭仔、排字圖，有當陣走對花木欉行迷宮、宓相chhoe7,忝也著倒佇草埔仔看天頂的雲，天頂的雲真（tsin2）清朗，有時分開有時合，囡仔開始幻想，白雲的形好親像咱生活中的某物物件。

會當借著lang3縫的時間，出來呼吸新鮮的空氣，舒展工課的壓力，是件爽快的代誌。暗昏日頭落山的時，阮準備欲轉（tuinn2）去，奇 （ting7）耍到有續，閣peh上火車頭耍，iah阮的腹肚是枵到大腸划小腸，三喊四喊給奇喊落來，看伊那走那趒(tio5)，哀一聲坐佇樹仔邊，正腳的鞋仔褪起來直直頓（tng3），講伊去予鐵釘仔鑿著，伊足受氣的那哭那頓，著是欲給鐵釘仔頓乎落落來，阮聽著驚一趒，走倚去看，一支生銑粗粗的二寸釘，一寸佇鞋內，一寸佇鞋外，毋但鑿入鞋內，連腳底嘛鑿足深的，血是chhop8 chhop8 tin喔，阮看一下險昏去，暗罵啥人chiah無責任，給鐵釘仔撣佇公園內，阮緊給送入去附近的民生病院掛急診，連醫生佮護士小姐to7看到haiN3頭，護士提綿仔搵雙氧水消毒的時，奇是滾到擋未稠，閣一時也看著護士小姐提消炎針來注的時，目屎是大細粒輪輪和。

經過兩年，宜蘭舉辦新年慶典活動，煞場過轉日，阮又閣來到現場，活動的鐵架仔、枋仔攏拆走也，毋過鐵釘佮鉛線，彎彎曲曲落到滿稻埕，四周圍有足濟人，可惜無一個有去注意著，阮有食一擺虧，即馬阮五個人，佇稻埕那巡那扱（khek4），集合起來的鐵釘仔差不多有１、２斤重，假使chiah個鐵釘仔若攏無人去給扱，毋知閣有外濟囡仔庀（phi2）會受著傷害。