學生演講稿-----下課囉-----

蓮蕉花台文雜誌（季刊）第十七期






　　　　下課囉 【宜蘭內城國小演講稿】 陳玉華撰稿 91/9/26


『噹-噹，噹-噹，噹-噹，噹--噹--』下課囉！下課囉！真-----濟同學，一聽著下課丌鈴鍾仔聲，叨像一尾蟲，囥店置尻川癢仝款，早著坐稠矣。吥閣置講臺頂，講課丌老師，好親像，完全攏無聽到，鈴鍾仔聲仝款，茲個時拵，一寡卡急躁丌同學，一直共老師駛目尾，老師看著阮哀求丌表情了後，即講，『茲節課到遮結束，後節課.....』無等老師講完，阮著親像放出籠丌鳥仔，『嘩！------』一聲著蹤出去教室。
草埔仔頂哩啦叫，像市埸鬧熱滾滾，同學一撮一撮，有真-----濟儂塊扑球，有丌塊跳繩仔、有丌塊幌韆鞦，有丌塊歕笛仔，有丌塊騎馬相戰，阿財，阿財騎馬浪浪來，置馬頂摔落來，摔一下真利害，呀！真利害。哎唷喂啊，我丌尻川，強欲烈做兩爿啦，逐個攏耍甲真----歡喜，由其是扑球比賽，更加有歡呼丌聲息，雙方丌勢力無分懸低，干哪看彼粒球，置空中飛來--飛去--，同學丌加油聲，一下矣懸，一下矣低，成了一首節、奏、曲。
我勻勻矣行唯教室。教室裡面恬恬無聲，干哪有幾個用功丌同學，抑閣坐店椅仔頂寫字，嘛有二、三個人置行棋。我徛店窗門邊看，風，微微仔吹來，感覺心涼、脾、透、開，樹仔葉飄搖，樹仔跤丌阿公仔，半撐倒，坐店置椅仔頂塊拄眠。望去一片草青色丌山坪，看著青天白雲，像一幅真-----姷真------姷丌圖。
『噹-噹，噹--噹，噹--噹，噹--噹--』上課丌鈴鐘仔聲，無情閣來響起，唉！俗語講得好：『煙火好看，無外久』，真----濟同學吥咁，走轉來教室，我亦乖乖矣，提課本大聲讀，雖然是短短丌十分鐘。我卻是覺得，下課時間真-----好，它不但會凍，予我丌目睭休睏、避免近視、恢復精神佮體力，閣會凍，予我活動筋骨。所以，阮欲好好矣利用，下課丌時間，做一寡對身軀，有助益丌活動。