2 學生演講稿--------------我的迫迌伴

我的迫迌伴 五忠 李 晉 撰稿

陳玉華 修稿

各位評判先生逐家好,我今仔日欲演講的題目是我的迫迌伴,我的迫迌伴,當汝有困難的時,誰會陪伴汝?置你失志的時,誰會鼓勵汝?嘿著是汝最介好的好朋友,我最介好的朋友也是我的迫迌伴,伊的名叫游文賓,是我塊讀三.四年的仝班同窗,逐個攏慣勢叫伊阿賓啊.

伊的頭毛捲捲捲,置班上的成績是普通普通,但是人緣誠好,毋管置查某囡仔,抑是查埔囡仔內底,伊的人際關係良好,攏是人氣王.我佮伊是麻吉,會使講是穿開跤褲仔大漢的好兄弟.置下晡拚掃時間內,我攏會佮伊店樓跤做伙掃,也會毋做蒂做空課偷偷仔耍,抑閣會提水桶貯水潑來潑去,潑到歸身軀澹kah kah差一點仔著感冒.

歇假的時,伊定定招我佮朋友做陣去校園扑籃球,原本我連基本的籃球技巧攏袂曉,予伊教落到塊,煞變成一個灌籃高手,這攏愛感謝我茲個最介好的好友,古早人講：「一牽成、二好運、三才情」,著是咧講「一個人卜成功,除了個人本身的才調佮能力以外,擱卡重要的是愛有朋友的幫忙,牽成才會當順利達成目標」。我少想欲叫伊一聲大兄.假日除了扑球以外,伊抑會娶我去買飲料請我口林,真正康概.

阮兩人最甲意做仝一款的代誌,著是置學校扑閃避球,揣一寡仝班的同學,做伙對抗別班同學,有時扑到對手[落花流水],有時戰敗走到褲跤離,大多數阮攏扑贏,有一擺扑太大力,球煞予阮扑破去,用足濟的膠帶,勉強給球黏起.抑閣有一擺球飛入去草堆內,揣一晡即給球撿轉來,每埸球賽攏真精采,阮的實力也越來越強.毋像卡早遐軟跤蝦.

我希望後擺閣會凍繼續佮伊做好朋友,今嘛伊已經轉到別間學校,好親像是置台北木柵的某一間學校讀,雖然伊離開阮,毋閣假日有時也會倒轉來學校揣阮閞講,做伙耍,也會定定扑電話佮我聯繫,希望有一工閣會凍佮伊做同班同學.佮伊離別的時,雖然逐家攏真毋甘,俗語說得好,「天下無不散的筵席」,閣卡好的情誼,有一天抑是會有分開的時陣。阮只好目箍紅紅送伊離開學校,祝福伊[一帆風順],

伊雖然離開校園,毋閣校園內猶原留有伊的身影佮笑聲,更加有伊好學不倦,彬彬有禮的典範,俗語講:[衫著新,人著舊]我也會永遠永遠珍惜阮長久建立的這段友情.我的演講到遮多謝逐家.