譀死恁祖宗

海翁台語文文學 第七期





　　　　　　　　 譀死恁祖宗 2002/02/01　　　　　　

進前，阮（guan2）有一間店面厝稅儂，頭一个厝跤講伊卜開洗衫仔店，契約簽簽咧，講煞得去銀行領錢出來，今仔日拄好禮拜日銀行無開，阮想講路頭赫遠（huinn5），代先將鎖匙交互伊，等待另工伊開幕兮時才補，過了一禮拜，伊拍電話互阮，講伊一禮拜兮時間，裝潢兮部份無法度成隔完成，希望阮會當佫乎寬限幾工，阮答應佫問講，若安爾汝呣知需要外濟工，伊煞咿咿喔喔應出，了後阮應講汝互我一个確定兮日期，阮怎答應，我看，汝開幕迄一工，我才包一包紅包來共汝賀禮，抑無汝若一個月了後才成隔好（si2），益阮呣著愛等汝一個月，時到汝若呣租，益迄陣卜安怎，伊聽甲爽見笑轉（duinn2）受氣，煞大聲罵（me7）阮:『做一 个頭家儂赫爾仔無度量，無愛租鎖匙還汝』。[唉！想起迄當時，阮拄準備卜搬轉來宜蘭兮時，甘無去宜蘭市稅一間厝，鎖匙摕來一禮拜了後，大伯仔知影叫阮轉去店祖厝，阮嘛共厝退還掉，甘無摕3500箍賠儂，佫笑笑一直共儂會失禮]。
了後我著拜託建設公司兮員工，替阮共厝租出去，第二个厝跤是兩个股份，卜做蔬菜中盤，足阿莎力，一開著是一年兮票，做一擺攏互阮，頭一個月兮租稅，中間人抽一半，阮想講啊即聲穩啊，以後食穿攏看著好，穩觸觸貓鼠入牛角，妥當啦~，啥知影過了一個月，伊煞拍電話講，遮兮市場生理做哩，伊投資40萬攏去了了啊，佮伊合股兮迄个股東，老早著落跑矣，翁仔某歸盤攏挻（thann2）起，講起嘛可憐，阮想卜來共關心，問伊值時卜走，伊煞大聲講，汝互我恰好搬咧，阮隨著去銀行共支票攏領倒出來，唉！加無閒兮。

想著貸款佮租金歸个心攏軟（luinn2）去，著貼單寫讓渡書佮出租，來看熱鬧兮佫少，一个太太想卜買，呣佫錢佫摕出，邊仔有一个少年仔，對早起9:30分開始，著來佇遮等我，到甲即當陣已經是下晡1:00，抑咧等我佮儂推測價數，看即个少年仔有耐心，著拒絕迄位太太，答應稅互少年兮，呣佫少年仔，拄退伍無外久，資金愛共怹阿母拈，簽約佫半個月了後才付款，而且佫是用卜做互伊兮鐵窗兮錢做押金肖抵，過十工了後，阿母透早7:00拍電話互我，講後來有兩个查某囡仔，嘛佮隔壁厝頭家拍契約，準備卜做共途佮大車拚，伊講足煩惱兮，傢私頭仔攏攢招勻仔，罵（me7）我那無拍電話互隔壁頭家，叫伊使稅互迄彼兩个查囡仔，哎唷喂呀，嘛咧笑甲跋跋倒，阮那有迄囉權利，抑是憑啥乜咧，卜斷儂兮財路，儂活佇世間攏愛食飯，有本等著來啊，儂講黃帝無急急死太監著是安爾，少年兮老神在在食凊飯咧等，後來迄兩个查某囡仔，市場探聽聽咧，鼻仔摸摸咧錢了儂無代，唉！真是未上戰場先喝（huah4）輸。
時間咧過嘛誠緊，兩個月後，阿母又佫拍電話來，講生理歹做啦，益囝卜佫做看覓兮，希望阮會當共鬥相共，儂稅厝是咧起價，益阮即个所在是咧落價，阮即聲佫是落2000箍，頭尾拄擋六個月，時矣、運矣、命矣，天（thian）不「pu2」從人願歸尾亦是著離開啦，一个儂若卜做頭路， 除了堅持佮毅力之外， 亦著愛有[耐]佮[守]]， 因為這兩字攏是一點一滴兮累積， 一寸一寸唯頂矣爬， 只要堅持家己兮原則， 總有一日會成功。





海翁台語文文學第七期