洗錢

洗錢

有一工，穡頭接袂著，閒閒無代誌，想看覓仔，有啥乜空課通做否？ah無時間嘛不知影欲安怎度？二樓e厝尾（bue2）頂會漏（lauh4）雨，囤置遐e冊，好親像有濕氣，而且架仔跤嘛有坱埃（ing ia）閒嘛咧閒，ah無來給拚拚咧，物件矯（chiau5）矯徒徒咧。
查某囝縋（due3）前縋後雀（tsiak8）雀趒（dior5），看著架仔跤有三個細罐e銅管仔，查某囝隨給拍開看，看著內面有貯（de2）錢，著提互我看，內底有囥（khng）真濟張100箍佮50箍e 紙票，銀角仔有5箍、10箍、1箍。茲兮錢攏生菇臭殕（pu2）真衝（ching3）鼻，我漏（lau2）一桶e清水來，一張一張勻勻仔洗，銀角仔一個一個攄（lu3），足驚大力給攄破，那洗那想，伊平時儉腸捏肚，原來私寄（sai kia）錢著是攏藏置架仔跤e銅管仔內，藏甲生菇臭殕猶不知。
我平時洗衫仔褲，只要短短半點鐘，今仔日，我洗錢煞著用一晡e時間，我洗錢洗甲腰酸（suinn）背庝，250張e紙票，80捅（tong2）個銀角仔，洗甲歸桶水攏反烏閣濁，我e 面嘛烏，我那洗那氣；錢洗好矣了後，著閣一張仔一張來給吹互焦，查某囝算錢算甲足歡喜e，我收收算算咧總共有兩萬外箍，平時看銀行專員攏是用機器來洗錢，ah我是用水來咧洗錢。



島鄉台語文學第11號199/06/30