拆灶請三王公坐鎮(王公抑會食糕仔)

台灣文化專刊 第46號1999/02/13

拆灶請三王公坐鎮(王公抑會食糕仔) 　　陳玉華稿

咱的社會是愈來愈發達，大多數 e 都市人攏滯置高級住宅，欲洗身軀（hun su）佮煮（tsi2）飯（puinn7）、焚茶，甘那用手輕輕給瓦斯（ga suh4）源頭拵一下，火（hue2）著來矣。勿講是用灶焚火，我看連厝尾頂e 厝瓦叨強卜滅跡去囉。阮（guan2）莊跤茲當陣抑閣有幾偌戶，剉柴焚火煮飯、炊粿（kue2）。嘛有一寡人共祖先留落來e 舊灶保存起來。

秀琴佮阿牙 e灶亦有30冬 e 歷史矣。唔閣久無咧用，嫌灶相鎮位，想卜來給灶敲掉，心肝底又閣驚去沖著煞，兩人參詳了後，隔轉（duinn2）工 e 透早，秀琴著攢青（tshenn）花、水果、清茶、金紙，去呼請三王公，請示三王公敲灶 e 日子，秀琴先點三欉清香，合掌，嘴唸講：「信女秀琴參阿牙拜請三王公來降臨，信女今仔日想卜請王公明示。信女我秀琴e 灶是憑東e 啦否，益阿牙e 灶憑西。益阮卜請示三王公，益當時矣來拆灶卡好勢（si3）。矣今仔日有出日頭， 日子誠姷，益無咱來共動工好麼？」。

磕了跋無筊，秀琴閣唸講：「益無東時，初四冬至日好麼？」。

阿牙講：「秀琴跋初四兮，講啥磕了聖筊。益王公知影我阿牙做代誌無遐潦草喔，王公知影我阿牙一定會聽lalio（radio）。

講茲個日九點我一定會聽」。益秀琴叨講：「好囉，扑算（suinn3）是日子姷 e款」秀琴唔捌字，卻跋初四。益我路尾拄好聽lalio講，初四日子誠bai（壞），初四受死日，是大凶，吉喜事不取。

「亦唔著矣咧」我講：「秀琴矣，益汝跋筊講初四，初四e 日子遐壞，汝卜拆汝去拆，益我抑無卜拆。」 　


隔轉工，阿牙家己呼請三王公。王公允准初九拆灶，啥乜時辰攏總會使拆，攏會安全。阿牙講：「我少年e 時卡唔識。今嘛，食到老即知，若卜做啥代誌，攏愛問神跋筊，愛翻日仔簿來看，未駛亂使做兮，安呢慎重攏總是卡安全兮。」

動灶彼一工，我問王公，拆灶動工e 時，甘卜去看，去坐鎮監督，王公講好。

瓦斯管撣落來e 時，我有閣請示王公，甘卜入大廳坐？伊唔肯，伊卜帶遐看到好。彼工置遐，彼灶磚（tsuinn）錠觷觷（ting7 kho kho），阮直直摃，王公置遐直直看。錦賢講：「喔哦！我一下摃，囥置灶邊 e大台瓦斯煞歸台攏憑落來。益旦這害矣，旦是卜按怎？彼條瓦斯管煞卡稠著。」

阿牙講：「免煩惱，有王公置遮，足安全啦。」彼日汝按怎摃，瓦斯管彼爿無一粒石頭仔，嘛無一塊磚仔角噴著叨位。三王公偌有靈感咧，錦賢啊，汝旦嘛叨知影喔。


編按：即篇稿來自台灣礁溪，三王公的故鄉。寫台灣民間宗教文化，日常生活事事請神的生活文化，或者可以佮西方基督教文化做某種比較。過去，雷根夫人南西攏找星象家看天相，安排伊翁婿的出外行程。希望有人用比較文化的角度來寫台美人的美洲經驗。(胡民祥 講述)

台灣文化專刊 第46號1999/02/13胡民祥主編