天佑台灣，稅稅平安-----------學生演講稿

天佑台灣，稅稅平安 撰稿：高嘉妤98/11/09
修稿：陳玉華 98/11/09
各位評審、來賓，大家好：我今仔日欲講的故事是『天佑台灣，稅稅平安』。
台語老師，愛我寫一篇佮稅有關的台語稿，我毋知啥乜是稅？我問老師，啥乜是稅？老師講：『國家為了施政支出，欲達成行政目的，依法強制向人民徵收的錢就是稅。納稅是國民應盡兮義務佮權利。政府向百姓徵收的稅，是為著欲建設公共設施。政府收取稅是暫時做管理，總有一工嘛是用置咱身上，「取之於民，用之於民」，雖然講政府一年度，向百姓收取遮濟稅，毋閣猶原是用置咱的身上』。
是啊，是啊，像咱宜蘭地區，所建設的公園仔、礁溪燒水溝、冬山河、宜蘭文化中心、圖書館、學校等所在，攏是靠大家納稅才有的公共設施，閣會凍予咱學習、讀冊、遊樂、認識歷史的功效。還有雪山隧道、高速公路、橋墩、道路或者是這次88水災、風颱啦，攏是自然界必然發生的代誌。造成50年來，最嚴重的水患，台灣百幾座橋梁斷裂，山崩地裂，造成土石流，風吹斷了線，傢伙去一半。須要做重建修復的時，攏嘛須要一筆錢，有錢好辦事。假使咱所繳的稅金若愈多，建設著愈多，按呢咱著享受愈多。
我置遮囉哩囉唆，竹篙鬥菜刀，稅倒底是欲按怎報？面對足多憑證，與複雜的報稅表格，汝是毋是覺得非常頭痛？其實，納稅人只要掌握幾個重要的技巧，著會凍予汝輕鬆申報閣省稅。平時要養成收集收據的習慣，例如醫生診斷書、看病收據與保險費收據等。可以列舉扣除的項目，包括醫藥生育費、保險費、房貸利息、災害損失與捐贈等，其中，醫藥費與災害損失可以核實扣除，春呢著有上限金額。
11月份又閣到啊，大家愛會記得量早納地價稅喔！若是遲繳是會被政府罰款。抑是講平時啊去超市買物件，或者是到加油站加油，攏愛主動索取發票，增加稅收建設好』，收取統一發票，毋旦會凍防止店頭逃稅，閣會凍對獎中獎金喔！『一兼二顧，摸蜆兼洗褲』。假使大家若會凍規規矩矩納稅金，著會凍創作社會福利，天佑台灣，稅稅平安』，我的故事講到遮多謝大家。