宜蘭人的驕傲

宜蘭人的驕傲 撰稿 ：黃詩庭 99/11/18

修稿：陳玉華 99/11/20



各位評審先生、來賓大家好，我今仔日要講的故事是：『宜蘭人的驕傲 』，『宜蘭人的驕傲』。『阿藝倌真正隋，噶瑪蘭厚雨水』，宜蘭雨水豐富了地下水源，佮地層中厚實的石灰岩，蘇澳冷泉變成天下第一奇泉。

蘇澳冷泉、礁溪溫泉是宜蘭地區的產業特色，冷泉不但清冷，而且閣富含二氧化碳的特殊，彈珠汽水含蘇澳羊羹，都是利用這股清涼泉水製造的。抑若礁溪溫泉的泉水是真特別的鼻袂著ㄍㄥ、鼻的硫磺味，而且閣會凍種出溫泉米、飼出溫泉蝦，溫泉蔬菜四寶有溫泉蕹菜（空心菜）、溫泉菜瓜、溫泉茭白筍、溫泉番茄。遮攏是宜蘭人的驕傲 。

置燠熱（àu-hip）的熱天，蘇澳冷泉總是會擠滿一大堆人，鬧熱滾滾。蘇澳冷泉水，水溫攝氏22度，水泉透明無色嘛無臭 不時閣會對地底冒出氣泡來，冰冰涼涼的冷泉，吸引著外地人來遮耍水，當然身為宜蘭人的我，只要有時間，阮全家著一定會去靴體驗看看。我一泡入去冷泉池裡面，歸身的體溫攏冷起，冷甲會交懍恂（ka-lún-sún），毋閣一聽著小朋友佮大人，吱吱叫的歡笑聲，著知影一定真爽快嘛真歡喜，彼時著袂感覺冷ㄚ，阮阿母講：『冷泉有很多碳酸水，會凍口林嘛會凍洗浴，閣會凍治療腸胃病，皮膚病含婦人病。所以逐家愛浸泡四、五擺，應該著會真爽快喔!』。我佮阿兄、小妹那泡那耍水，實在有夠讚，泡好了後阮著店出口的外圍，共賣彈珠汽水的阿伯仔買五罐來

口林，後來閣踅過附近的蘇澳漁港，靴有真濟種類的魚仔佮飛虎魚丸，人講：『魚趁生，蝦趁跳』，所以阮阿爸佮阿母，著買真濟鮮魚仔佮飛虎魚丸，本底阮阿母閣想欲買黑暗鑽（黑鮪魚），可惜已經賣了了矣，阮阿爸著講：無要緊啦『無魚，蝦也好』，著秤三斤活跳跳的蝦仔，拄ㄙㄚ好（煮熟）的飛虎魚丸真好食，阮置路哩那行那食。

抑那講著礁溪溫泉強強滾，是真受歡迎e，寒天一到，來來往往的遊覽車客，實在有夠濟，每擺若去礁溪泡溫泉的時攏客滿，連湯仔城燒水溝的外圍，嘛攏予遊客做滿滿咧浸跤，假日的時，阮阿母攏會娶阮去「春風日式泡湯」，靴的溫泉，一開始泡落去非常的燒會燙人，但是泡一段時間了後，著感覺真爽快起來，身軀淋著溫燒的泉水，著感覺歸個人攏tsiau輕鬆起來，有一擺，我佮阮阿母去礁溪溫泉的時，看著外國人!e h外國人攏來遮泡溫泉呢，可見礁溪溫泉是超級有名的呦!

毋管是外地人或者是外國人，來宜蘭thit-tho（遊玩）的遊客，攏會買寡宜蘭名產轉去做等路喔。我的故事講到遮，多謝逐家。

愛護美麗好臺灣

愛護美麗好臺灣 撰稿：何奕儒 99/11/12

修稿：陳玉華 99/11/13




第三屆台大校友盃國語相聲暨閩南語說故事講笑話------佳作




各位評審先生、來賓大家好，我今仔日要講的故事是『愛護美麗好臺灣』，『愛護美麗好臺灣』。

首先我來紹介咱臺灣美麗的寶島，大海闊闊，山明水秀，花芳水甜，冬暖夏涼，四季如春，每一個季節攏有無仝的景象。一年的開始著是對充滿生機的春天講起，春風微微仔吹，春天樹枝puh新芽，百花齊放滿山坪，鳥仔啾啾啾、蝴蝶快樂滿天飛、還有囡仔歡樂的笑聲，真正是「溫罐破空—鬧熱」。

那是置熱天，樹阿頂的蟬歸日叫無停，草仔埔各種的蟲仔聲、田蛙仔嘓嘓叫、蜜蜂採花蜜嗡嗡嗡，好親像置咧開音樂會仝款鬧熱滾滾。閣有每一種的水果是甜甲會生蚼蟻，就像「新埔椪柑—尚好」。

秋天的風著像一個愛耍的囡仔，將楓仔樹的樹葉仔，染甲紅紅紅紅，又閣將樹葉籽掖甲一四界，真正是有夠giat-siau5-e7 。

冬天的梅花，像十七、八歲的小姑娘，妖嬌閣美麗。白白的霜雪，對天頂飛落來，替怹披上一領雪白的禮服。大人佮囡仔歡喜置合歡山咧玩雪。

毋過因為有一寡人，毋知啊通珍惜，不但垃圾亂撣，而且看到美麗的花蕊，著隨意將它挽落來。還有一寡人佇山坡地亂種檳榔，也有人過度開發起别墅﹔將釘土的樹根、樹木攏砍掉，被砍掉的樹木，根會挽住土石，落雨的時，水會對土底流落去。無親像現在土石鬆鬆，風颱一到，水無塊流，著對山頂上頭直接沖落去到山跤，連土石含樹木同齊流下去，造成足帶置山跤的房屋住戶，被土石淹蓋介危險。像去年「莫拉克風颱」時，台東的知本溫泉和南投盧山溫泉，攏是人為過渡開發所造成，最可憐的是高雄小林村全村被土石流埋二、三層樓深，到現在嘛無辦法挖，『火燒罟寮全無望，擔沙填海了戇工』，現主時，毋旦看袂著美麗的風景，嘛聽袂著鳥仔的叫聲，佮囡仔嬉鬧的笑聲。

俗語講：『厝驚無穩，人驚忘本』，咱愛守護祖先的恩賜，好好保護咱的地球，人講『樹頭若徛有在，毋驚樹尾做風颱』所以咱愛做好水土保持，佮大自然共同生存，大家做伙來建造台灣，才袂閣再有靴濟危險的災害發生，予咱囝孫過著幸福的日子。臺灣美麗好所在，四季如春真正讚。水土保持要做好，山崩地裂袂閣來。糞圾分類毋通放，毋通放，囝孫歡喜又安全，又安全。我的故事講到這，多謝大家。

欲按怎培養品德教育

欲按怎培養品德教育　　 撰稿：　林智傑 99/11/15

修稿： 陳玉華 99/11/16

　　

　阿土自細著無爸無母，伊佮阿媽生活，受阿媽晟養，阿媽一手擔起照顧阿土啊的生活，阿土的阿媽認真、扑拚咧做穡，想講欲予阿土佮人會凍比平，看會凍日後出頭天袂，毋閣阿土啊細漢的時著真頑孽，定定放火燒人的草垺，耍斷人的菜園，置學校 毋聽 老師的教訓，上課吵吵鬧鬧，真無規矩，歸工弄溜燃，到尾仔學校無去，閣毋揣頭路趁食，甘那知影共怹阿媽討錢過日，用錢像咧用水開真雄，無夠用的時著去共人搶錢，若無著是佮人冤家相扑，殺人放火，作惡多端，是一個十惡不赦的人，是社會的一尾毒虫，未滿十六歲，行警察局像咧行灶跤，一直無悔改，路尾著關入監獄內。假使阿土仔細漢的時，若有好的規範，好的規矩，好的人品，今日嘛袂跋落『萬丈深坑，無法自拔』，予人跤煉手煉，『一失足成千古恨』。



一個人的品德、人格，著愛對細漢培養，品德的教育是毋是有徹底建立，著愛看咱每一個人，是毋是有徹底來堅持教育佮實行。人的品德、人格教育是非常重要，但是一個人的品德、人格教育欲按怎來培養，每一個人的講法佮看法、做法攏無相仝。人一出世著受著爸母的晟養、教育。序大、長輩是咱頭一位老師，是咱頭一個模仿的對象。俗語講：『大隻狗爬牆，細隻狗看樣』，『上不正，下則歪』。置細漢的時，爸母除了晟養、教育囡仔以外，嘛愛做好模樣予囡仔看，家庭的教育是個人品德教育的基礎，一般來講，啥乜種序大著教出啥乜種子女，『教囝學泅，毋通教囝爬樹』，『嚴官府，出厚賊；嚴父母，出阿里不達』。



其次就是學校教育，學校的品德教育，老師除了愛以身作則以外，嘛愛有真善美的腹腸，來教育、引導、接受、教化佮輔導一寡較歹教示的囡仔。假使學校若無法度接受靴頑孽的學生，將頑孽的學生撣予社會，茲聲著害溜溜啊。



最後是社會教育。『人無照天理，天無照甲子』天理人道混亂，是非黑白顛倒。台灣茲幾年來社會及教育攏真亂。重重疊疊的犯罪事件，已經毋是用法治，有法度管的，這主要的原因，攏是公眾人物的言行與媒體的操作的動作。置社會徛起，欲予人來尊重，往往人的生活，應該愛有真濟行為的準則，愛有一支道德的尺。人是群居的動物，有家庭、有社會，這是互相對應，品德的教育袂當講一套做一套。社會品德教育是毋是會凍成功，是毋是會凍提升，著愛有耐心去感化，社會的和諧須要大家共同來維護。 我的故事講到遮，多謝大家。

樂活宜蘭快樂行

樂活宜蘭快樂行 撰稿：黃語柔 / 黃大豐 99/11/20

翻譯：陳玉華 99/11/20

各位評審、來賓大家好，我欲講的故事是：『樂活宜蘭快樂行 』。

置燠熱假期中，阮全家會計劃『樂活宜蘭快樂行』，體驗一下仔大自然。『無行袂出名』，彼工阮對員山仔出發，置泰山路頂歸排攏是員山魚丸米粉。順著省道斡對員山結頭份大樹跤，看本地歌的起源地，置遮好像抑會凍看著蘭陽先民，置歌仔樹跤，優閒咧唱本地歌仔戲的情景。探訪大樹跤了後，閣前往三星地熱sa7雞蛋食三星卜肉。沿羅東方向行，一下仔著到羅東夜市仔，遮有賣宜蘭糕渣、阿灶柏羊肉湯、紅心粉圓、三星蔥油餅，閣有比面較大個號稱12盎司的大雞排，美味可口食了會suah喙想欲閣食。夜市仔踅煞，順蘇澳省道前往武荖坑，阮倒店草埔仔算天星，聽溪谷天籟之音。當然有時也會置武荖坑搭帳篷睏、睏袂去的時著佮阿兄一直開講，講甲真晚抑毋睏，有時會予大人罵講：『話卡濟過貓毛』，『早睏早起床，才袂頭昏昏，腦頓頓』。可是阮抑感覺真歡喜，真好耍。



天一光，阮著來到人客滿的蘇澳冷泉，聽著小朋友吱吱叫的笑聲，著知影是冰冰涼涼的冷泉水嘖置身軀頂。來冷泉區，當然著愛口林最出名的彈珠汽水，食宜蘭蘭四寶鴨賞、膽肝、蜜餞、羊羮，順煞買海產。『魚趁生，蝦趁跳』，假使若會凍到海產店，食一盤一盤的海鮮料理的話，嘿著閣卡讚囉。沿著蘇澳省道往北行，阮著轉來到宜蘭市。

置宜蘭市，會凍看到東南亞，最大的蘭城新月百貨公司，想欲購買物品，會凍到地下室B2的家樂福去，想欲看冊著店樓頂的誠品冊局，置茲個所在，會凍充分感受到宜蘭的繁榮景象，佮人文步調，宜蘭是一座古城，四界有歷史歲月建築佮文物，毋管是設治文物館，九芎程抑是酒廠，處處攏流露著日本時代留落來的跤跡。

最後來到礁溪鄉，品嚐在地溫泉風情，將跤泡置燒湯內，享受無仝的感受。遮水青山青翠、到半山腰的五峰旗瀑布，更加會凍體會到一種山林環繞的悠閒，漫步置山林間，好像回轉遠古時代，只有樹木佮人置空曠的所在獨自對話。往礁溪閣過去一點仔，著到山含海交界處的外澳囉，置遮汝會凍享受藍天白雲、感受海湧溢來溢去的快感、衝浪沖懸的刺激，坐店沙埔頂遠望龜山、將心靈放空，享受大自然的呼吸。

置宜蘭時間是悠閒的、步調是緩慢的，置茲工商業快速繁忙的社會中，宜蘭人試用古早農村的悠閒步調，來實現所謂的「慢活哲學」，這著是宜蘭人的驕傲所在，永遠堅持家己的跤步，置山林海濱的自然環境中，體會先賢所流傳落來的生活哲學，將他傳予後代，代代相傳、生生不息。我的故事講到遮，多謝逐家。