屈佇沙埔一半暝

掖種台語社通訊 第二十一期 1998/11/15

收錄台灣台語社推廣教學台語文研習班研習手冊 2001/03/06

屈佇沙埔一半暝 陳玉華稿

這工，阮（guan2）歸家伙（hue2）鬥陣來佇海邊仔，耍（sng2）沙仔做城堡、開圳溝、畫圖兼教囡仔學寫字、掠沙馬仔。當阮耍甲真（tsi2）歡喜个時，囡仔講：「阿爸走佗位去咧？」我舉頭四界揣（chue7），遠遠（huinn7 huinn7）看著伊佇咧抾銅管仔，我---毋知卜按怎講伊才好，伊个歲（hue3）頭食到澀澀(siap4 siap4四十四)，面皮（phue5）liap4 liap4。厝內底囤冊囤甲攏囥(khng3)無路，伊个頭殼內貯（te2）个是一字閣一字。自從搬轉（tuinn2）來庄跤了後，毋管行到啥所在，伊个目睭不時著展甲真（tsi2）大蕊咧巡大路，看有啥麼歹銅舊錫無。我若講伊也毋是毋捌（bat4）字，哪著遮狼狽來佇咧委屈家己咧 ，伊著應講：「咱社會上个人，若逐家攏親像汝這款想法，台灣永遠著袂出脫。」伊閣講：「路裡个鐵釘仔、鐵片、若是攏無人去喢(chap4)，騎oo-to-bai（機車）个人，著個個攏摔甲大空細裂，台灣人若無環保觀念，若按呢，咱著會共這塊美麗个寶島，變做糞圾山來予咱个囝孫帶咁毋是咧，認真來共想起來，實在是足可怕个」。我毋管伊，伊抾伊个，阮耍阮个。日頭卜落山矣，比較起來加誠(ciann5)冷，沙馬仔攏對沙仔底倒出來囉，囡仔掠沙馬仔掠甲四跤向上（ciunn7）天，耍甲毋知人。

暗矣，腹肚枵(iau)矣，遠遠看伊共車駛過來，我趕緊共物件款款收收咧，行對車迄爿(ping5)，啥知影，車煞跋落輪，椆(tiau5)佇沙仔埔內，駛袂震動，伊吩派我去揣(chue7)枋仔通好siap4車輪仔，毋閣阮揣著个攏是細塊無夠力，油一下催落去，柴枋仔隨隔對輪仔个兩爿嘖倒出來，車輪煞愈陷愈深，阮个心情嘛綴(tue7)咧起起落落，就按呢，重重疊疊做幾何(a7)十遍，輪仔仝款無法度趴起來，逐家閣再分頭去揣枋仔，揣閣卡大塊个枋仔來。

天色愈來愈暗，連月娘佮天星嘛出來共阮鬥關心，阮著靠著一絲仔月光（kuinn），四界（ke3）揣柴枋仔。這个時陣，除了遠遠海面上个三、四隻船仔傳（thuan5）來个ian9-jin2（引 擎）聲，佮一景一景个海湧聲以外，四邊攏無人矣。四週圍攏足恬靜(tiam7 cing7)，予我想起鬼魂个代誌，上驚目睭前出現一个白色个魔神仔，想啊想，面煞麻去，手肚肉嘛攏起雞母皮。這个時陣，海岸邊出現一粒个青（tshenn）光，浮浮沉沉，起初我叫是鬼仔火（hue2）出現矣，驚一趒，跤步停咧毋敢徒（sua2）。我心頭掠予定，閣來共詳細看斟酌，喔！原來是海岸頂有三、四个人咧釣魚，害我驚一趒。向頭前看，我發現一塊大塊閣長條个枋仔，我趕緊共捎（sa1）起來，走對車迄爿，這當陣，三个囡仔攏佇咧喝腹肚枵（iau1）矣，益我嘛是枵閣忝（thiam2)矣，忽然間，天頂烏雲遮月，落了一陣（tsun7）大雨，四面暗摸摸，我隨喝（huah4）囡仔入去車裏宓雨，順紲叫睏一醒（tshenn2），看會袂記去腹肚枵个代誌無。




當囡仔睏一醒起來，起來問講：「阿母！是按怎過兩三點鐘矣，咱个車仝款閣停佇遮咧？」我共囡仔解說講：「恁老父傷過頭緊張矣，方向煞來拂毋著去，車才會閣倒轉來原來个所在，職馬又閣對頭仔一步一步來。」雨停矣，阮趁著光，閣去揣柴枋仔，會使講歸片沙埔攏予阮揣透透矣，好佳哉，天無絕人个生路，總算閣予我揣著三、四塊大塊枋仔，這時我心內起了足大的希望，古早人講：「堅持意志者成功有望。」一點仔都無毋著，伊的耐心，伊个堅心，上會凍予我心服口服个。



轉去厝裏，著已經是半暝仔點半矣，洗一下身軀（hun su），食一下仔飯（puinn7），著已經半暝兩點外矣，我共逐家講笑講：「益無咱歸氣閣來去海邊仔，觀賞一下仔日出，恁看啥款，三个囡仔聽著驚一下，緊藏對房間仔內去睏」。