我的心願----------------學生演講稿

我的心願
撰稿：林智傑99/0621
修稿：陳玉華99/06/26
各位評判老師、各位來賓逐家好，我今仔日欲演講的題目是『我的心願』，『我的心願』。
自從我讀冊以來，無論置學校抑是置厝內，定定會予人問起，我未來的心願是啥乜？置學校內，老師嘛定定用『我的心願』，作為作文的題目，雖然講我寫過真濟擺，每擺所寫的心願，攏是大漢了後欲做一位醫生，俗語說：「第一賣冰、第二作醫生」，醫生的職業不但固定而且閣好名聲，此外，我也甲意醫生對空課上的執意。為啥乜我欲以做醫生當做我的心願，因為我感覺醫生是一個醫術的專業者，而且閣是一個慈悲為懷，濟世救人，仁心仁術、奉獻精神的大善人，是會予人尊敬的行業。

俗語講：『醫生驚治咳，總舖師驚食晝，土水師驚掠漏』，做醫生的嘛有伊困難的所在。會記得我每擺若破病感冒，khu2 khu2嗽，嗽袂好的時，醫生總會詳細來共我看診，揣出我的病因，對症下藥，解除我的身苦病痛，解除我的無爽快，『先生緣，主人福』。予我會凍有精神、有體力、來學校上課、讀冊。咱來共想看覓，咱人一生當中，誰人毋捌破過病，只要人若一破病，著愛予醫生看，予醫生來治療，所以醫生是予病人所期待的。

最近有一寡人，對醫生負面的新聞報導，為了追求閣卡好的收入，做了違背醫德佮傷害患者的代誌，茲款傷天害理的事件，予我深深的感慨，我感覺醫生除了有專業的醫術以外，閣卡愛有善良的心地，無私的奉獻精神，我的心願，是欲成為一位有良知的好醫生，照顧需要照顧的病人，對破病的病人，付出閣較濟的愛心佮關懷，這才是醫生的責任。

假使我將來若有能力成為一個醫生，無論是啥乜款的病人，是貧是富，是男是女，是大人抑是囡仔，置我的目睭內，是攏無分別的，我若做醫生絕對袂大細目，對待患者一律平等，我一定會認真扑拚，全力以赴，做一個仁心仁德，追求正義佮公義，作為病人的依靠。當然欲成為一個醫師，毋是置遮『空喙哺舌」，『講甲歸畚箕，做無一湯匙』，嘿是需要不斷的努力佮扑拚，除了成績好以外，長年的求學過程攏需愛有耐心佮毅力，茲種過程是真辛苦，為著欲達成我的心願，我一定會刻苦耐勞，揣時間讀一寡有關的醫學冊本。我的演講到遮，多謝逐家。