考試的時陣

考試的時陣 陳玉華96/09/07撰稿


見擺若拄著考試的時陣，阿母攏比我較緊張，呣是交待這，著是交待那。放學轉來，就抑未口林喙茶休喘咧，伊著開始喝講：「緊咧，緊將老師幫恁復習的彼張單，提出來閣看幾遍啊，平時老師幫恁劃的重點加看幾擺，國語自然愛看，英語社會愛背，數學愛加算幾擺，鉛筆擦仔會記得紮，若按呢，明仔載考試的時著萬無一失，恁知麼」。我應講：「知----知---知，汝已經交待幾囉遍，我攏共汝交待的話背起來啊，今仔日勿會凍看電視，勿會凍耍電腦，愛較早睏才有眠，明仔載才有精神通應付考試」。唉 ! 真正是黃帝無急急死太監。
考試的前幾分鐘，逐家是緊張甲心肝咇嘭采，有的緊張甲一直走便所，有的店桌頂畫土符，刻字做標誌，想欲偷食步，做一寡有空無榫的代誌，抑若我是老神在在，安如泰山，因為考試前我早著準備好勢啊，我有相當的把握。呣閣我的好朋友阿蓉仔，伊逐工攏顧耍，讀冊攏無要無緊，我問伊考試準備好未，伊攏講安啦時到時擔當，無米才煮蕃薯湯，我勸阿蓉仔講：有燒香就有保佑，有食藥就有行氣，俗語講：偷掠雞也著一把米，汝愛有付出才有收穫啊。阿蓉仔不但聽勿會入耳，閣罵我囉嗦，唉 ! 好心乎雷吻。
鈴鐘仔聲噹-----------時間到啊，老師提著考試單仔，入來教室的頭一句話講：「請各位同學，共課本收入冊揹仔內準備考試，老師欲發考試單囉，提著考試單的人，愛先將家己的名姓，班級號碼寫落，有問題請夯手發言」。當我提著考試單的時，我心花槽開，題目有夠簡單，這聲妥當啊，貓鼠入牛角，穩觸觸，欲提100分甘那桌頂拈柑咧，我寫無10分鐘，已經將考試單仔寫滿，坐店椅仔頂等下課，這時我看著坐置我頭前的阿蓉仔，想空想縫，ㄥㄥ一ㄚㄇ一ㄚㄇ，想欲偷看別人的考試單仔，像伊按呢欲那有好的成績，老師有講過，考試是欲測驗家已的學習能力，偷看別人的，不但欺騙爸母老師嘛欺騙家己，是呣對的行為，應當愛認真拍拚，跤踏實地才應當。