學生演講稿--------我的心願

我的心願 撰稿：黃 揆 媛 99/08/04
修稿：陳 玉 華 99/08/08

各位評判老師、各位來賓逐家好，我今仔日欲演講的題目是『我的心願』，『我的心願』。
我相信佇茲個世間上，毋管是啥人，攏會有一個小小的心願，我也知影世間上的人，每一個人的心願攏無仝，有的人，一心一意想欲做歌星來娛樂逐家。嘛有的人想欲做醫生，濟世救人，解除病患的身苦病痛。有的人想欲做老師，來教育囡仔，予囡仔變成一個社會上有路用的人。有的人想欲做一個總鋪師，煮出好食的手路菜，予人客滿意。人人若一旦有了心願，著會認真拍拚朝向目標，來達成實現家己的心願。

恁甘知，我的心願是啥乜，我共恁講，我的心願是欲做一個「大企業家」，通好賺真濟錢，來救濟須要救助的人，予怹有飯通食，有衫通穿，另外，閣欲買車、買一間心目中理想的厝、一間內面有真濟房間的大間厝。自從我讀一年仔開始，著有茲種心願？我為啥乜有這種心願？因為自我出世以來，著含阿爸、阿母、阿姊、閣有我四個人，逐工攏擠店一間tsiau5細間仔的房間內，阮的房間是窄tsiu tsiu，塞統統，我真希望我會凍佮同學仝款，有一間私人的房間，房內會凍囥真濟私人的物件。
我真的，真想欲趕快完成這個心願，想欲趕快叫仙人共我點一下，予我趕緊變成一個大人，我逐工攏塊期待明仔早仔，想講天一光，目睭一展開，著會凍看著家己，已經變做是一個堂堂正正的大人啊！我連眠夢中都夢到，我已經是一個大人啊，已經咧賺大錢啊，雖然講這是眠夢，可是我還是一直期待著明仔早仔，還是真希望真的會凍實現。
阿母吐大喟講：『汝喔，做代誌推推沙沙，歸工無要無緊，「卡早睏，卡有眠」，「睏罔睏莫眠夢」』。老師講：『緊行是無好步，緊走是無好路』，人一生的生長過程，著必須唯幼嬰、囡仔、大人、老人，一步一步慢慢大，慢慢學，只要汝跤步踏在、踏穩，有相當的付出，自然著有收成，免驚日後無享受。
俗語講：『命底天註定。『賺小錢靠打拼，賺大錢愛運命』，雖然講『錢四跤，人兩跤』先追嘛追袂著，毋閣，我相信咱只要認真、拍拚朝向目標，咱愛『先苦後甜，富貴萬年』，先食苦，後享受甜美的成果，這種幸福才會長久，汝我認真、拍拚，朝向目標，共同來達成實現家己的心願。我的演講到遮，多謝逐家。

（857字）