學生演講稿----------我上欣賞（尊敬）的人 演講：楊雅靜

我上欣賞（尊敬）的人 演講：楊雅靜

（指導）撰稿：王美珠

修稿：陳玉華



各位老師、各位小朋友，逐家好，逐家平安無煩惱。我是第 號，我欲講的題目是：我上欣賞的人，我上欣賞的人。逐工透早雞未啼狗未吠，厝內面的鬧鐘仔聲就會彈，噹---------，有時準我嘛會雄雄被吵驚醒睡不去，想說到廚房喝寡滾水，了後看擔bo仔書，看到大廳好親像有一個人影在勒叮動，目睭金金斟酌甲相，原來是阮阿嬤啦，她正置咧甩手、踩腳，阿嬤七早八早著起床足百起來咧做運動，阿嬤今年已經滿80歲年歲有卡老，毋閣啊，伊是[老骨硬康康,老皮袂過風]，身體抑擱勁勇健，外表看起來是老古錐啊老古錐，因為阮阿嬤平時仔是有在保養，她常常講身體若勇健，無tap tap 滴滴， 會行閣會走，序細啊就好命，嘛因為按呢，我對阮阿嬤是勁欣賞，她樂暢而且啊事事項項攏會替人設想的。

阿嬤知樣我今嘛正在大當爻食，放學若轉來了後攏會餓甲大腸告小腸，她就自己做一寡點心，親像卜酥餃、滾石花、做芋圓、煎菜頭粿、滾粉圓、紅豆仔湯，哦，講甲我嘴涎強要津落來，阮阿嬤會先攢寡點心來給我吃，阮厝說這是阿嬤牌的點心，外面是有錢嘛買無著e，阮有這呢貼心的阿嬤，擱這爻變東變西創予阮吃，真正是半暝啊點燈仔火嘛無當找。

我阿嬤真骨力擱勤儉，伊定定ka 阮講：「人愛『勤儉即有底』，咱莊跤人無什麼手藝，感謝天公伯仔對咱有看顧，予咱有一塊仔田地通好種作，古早人講：百般手藝，毋值得鋤頭落地。這世人攏靠這塊田地飼咱這口灶，恁阿爸、阿伯、阿姑的教育ka 才情，嘛是全靠跤底這塊土地的栽培 ka晟養。雖然做穡人看天食飯，種作無快活、真艱苦，毋過咱著愛知足常樂，俗語講：「做雞著筅，做人著反」，『甘願做牛,毋驚無犁通拖』只要咱肯拍拼骨力耕作，天公伯仔一定會kah 咱照顧。」

之前在日本有一個超級阿嬤，在阮厝嘛有一個超級阿嬤，這句話是要按那講ㄌㄟ？會記得有一擺，我阿媽叫我去橘仔店糴（tiah）3斤的米，我將米mok轉到厝時阿嬤開嘴講：我拿看買，我煞嘴講：不免啦！阿嬤，我來拿就好。阿嬤講：『憨阿孫，阿嬤是買拿看買頭家是有搶稱頭無』。我煞目睛金金，嘴仔開開看阿嬤抱那包米大聲喊講：「這不可能啦！這包米一定沒到3斤，你這包米是對都位買帶我來去，我去甲頭家說生利人不可按呢」。看著阿嬤氣pu pu去找頭家理論，我心內嘛感覺怪怪，阿嬤攏還沒用磅仔稱看，就走去找人輸贏，甘有影是生利人搶稱頭，還是阿嬤差著半公分在甲人計較，我跟去看，一到位阿嬤就說：頭家，阮孫都假來甲你糴（tiah）3斤米，好親像沒到3斤喔，頭家馬上磅看，真正差半斤那重，跟阮回甲賠還多送阮半斤米。我看一下心肝頭高興一下，對我阿嬤又擱欣賞又擱尊敬，不知都一天我才會得到我阿嬤的真傳。

我的演講到遮，多謝逐家，祝逐家像阿嬤仝款，身體健康，老骨硬康康,老皮袂過風，多謝逐家。