阮囝是天才

島鄉台語文學 第8號 1999/02/05

阮囝是天才 陳玉華　稿

十冬前我pang見一個條直閣古意、肯拍拚、顧家 e翁婿。即十冬內我靠著兄弟、姊（tsi2）妹、朋友 e 疼痛佮做家庭代工衫仔褲，來晟（chiann5）養三個囡仔。我暝拚日拚，無形中也栽培了一粒定時炸彈。我足驚兮，我足驚即粒炸彈，不糝（sam2）時著會給我彈甲碎糊糊。


阮（guan2）兜即粒糖酸丸，會用兮講是我千算（suinn3）萬算才算出來 e。即個囡仔有夠人才閣貧（pan5）憚、手槍(賤死無人)。伊做過足儕活欲互我氣死 e代誌，像講我置咧煎魚仔e 時，伊對外口塗跤兜搣（mi）一把沙仔，掖（ia7）對鼎底；chua伊去踅（seh）菜市仔e 時，踵（jing2）頭仔迴過來閣迴過去，勾著生理人 e舊溫水瓶（pan5），揪（kiu2）落摔破去，遂著賠人三千箍；佮細漢囡仔耍（sng2）e 時，嬰仔提蹉跎物仔給摃，伊心肝底誠不服，趁大人無注意 e 時，刁故意伸跤給跏（ge5）互倒，彼時我想講，奇 （ding7）赫細漢著有報復e 心理，大漢是欲安怎咧！




入學無偌久，定定愛佮囡仔相拍。寢（chim2）頭仔是一對一，路尾仔遂一對五，轉（tuinn2）來厝裡攏講伊偌勇拄偌勇，歸個面是全傷了了。囡仔互相dih來dih去，有一擺卡嚴重，互囡仔踢去撞著門（buinn5）邊，頭殼血涾（chap）涾流，去病院紩（tinn7）兩針。平時仔我無允准伊紮錢去學校，伊遂給同學借50箍轉來，伊知影講錢若是用完，家己著無錢通還數（siau3），一直囥置衲（lak）袋仔底吥敢開，我洗衫撏（lim5）袋仔才知影，


隔轉（tuinn2）工隨chua伊當老師、同學e 面頭前還錢，順續給借伊錢e 查某囡仔講：[汝安呢借奇 錢買糖仔是咧害伊，吥是


咧給鬥相仝，後擺誰人若借奇 錢買糖仔，我著無欲替奇 還錢]。


置學校功課due人袂著，早節課老師叫伊去輔導室補習，包括學校e主任、老師、家長攏總七、八個大人，無才調給伊e ㄅㄆㄇ拼音教互好，為啥物呢？即個囡仔吥知是安怎對學業足排斥閣自我放棄，後來我著粒積淡薄仔錢，送伊去安親班，寢頭仔老師搭胸坎仔保証，絕對有法度將我e 囝教好， 考試絕對有80分以上，經過一個月了後，囡仔e 筆跡有影變嫷，吥過分數進步無10分，即個囡仔根本著無心，安親班e 老師無法度落台，著講囡仔e [感覺統合]無協調，愛食藥做治療，愛講笑，老師投降矣，吥過陶土班e 老師講伊真認真學。


搬轉來庄跤，我著無閣倩（chiann3）人教，家己逐工撥兩、三點鐘e 時間，來教囝讀冊寫字。我若教伊唸冊，伊著頭仔敧（ki）敧，目睭激互瞇（vui）瞇，若無著是冊本離目睭三尺遠（huinn7），我若喝聲，伊著趕緊將目睭搭偎置冊頂面，像咧唱歌，聲調有懸有低，有東時仔無聲，唸置喙底，有時洶洶喝甲足大聲，像陳雷聲，撜（denn3）悾撜痟（siau2）；我若教伊學寫筆劃，伊著激甲懶尸懶尸，提筆提袂好勢（si3），字寫無40格筆lak欲20擺，逐工若寫著字著目屎流目屎滴，哮甲大細聲，哭死活來吥寫著是吥寫閣吥學，我若講東伊著講西，我若講鱟


桸（hau7 hia）伊講飯篱（le7）；伊若做吥著代誌，我若給教示逐喙歪目睭掣（chuah），性地vai又閣歹，若是討無物件，一枝喙像曲盤跳針仝款唸袂煞。




歸工干單知影去港底釣魚仔，潦水溝簹（dng）魚仔、補破網醬甲歸身澹漉漉，臭臊叮噹(tin7tong7)，一年365工感冒300工；若無著是拍球、溜直排溜冰、騎自轉車仔四界徘(hui)，唵嘓雞，歸工若吥是蹤著是走，四界賴賴趖，拂(hut)甲一身烏鬼鬼，一工換欲四軀（su）e衫仔褲，講也講袂翻撦(chia)。伊佮伊 e同伴若踏入到厝內底，著開始蹧(jor)賤一寡物件，耍耍咧著吥知影通閣收倒轉去，蹉跎物仔是摒(piann)甲一四界，罵（me7）也罵袂變，拍也拍袂驚。




話閣講倒轉來，囡仔若袂賤著無親像囡仔，皮罔皮嘛有伊古錐 e一面，奇 自細漢著誠好喙，看著人著會佮人拍招呼，阿婆、阿伯、阿姨長阿姨短，厝邊頭尾攏呵咾伊好喙，若有人客入來阮兜，伊嘛會斟（tin5）茶請人客飲；看著路邊被放捨e 狗仔囝，嘛會給呼（ko）倒轉來飼；朋友若受傷，嘛會蹤轉來提藥仔去給伊e朋友糊傷，誠有愛心；目識嘛誠好，行過e 路線嘛攏會記得；若是有機會看著工人操作空課，轉來隨有樣學樣，無樣才家己想；腹肚枵（iau）e 時嘛會罔揙（binn3）來食，伊五歲 e 時著會家己煮（tsi2）點心來食，材料是互我想袂到 e，伊對冰箱挖一丸龍眼乾肉，閣對櫥仔底抄一把冬粉，囥置鼎底煮，袂siunn甜嘛袂siunn洘（kor2）；前日仔伊講伊大漢欲開餐廳


做總鋪，伊講無讀冊袂死人，阿公、阿媽無讀冊吥是仝款活到74歲閣誠康健。若伊哦，細漢e 時講e 志願上儕，對做總統到甲提糞埽，百幾途e 行業伊攏欲包。