朝日－－－東北角

蓮蕉花台文雜誌 創刊號 　

夏朝日－－－東北角 陳玉華作1999/01/01

天拄拍普光（kuinn）e時，我徛（khi ā）趈（t ām）窗門前，望去天頂，天星點點熠熠（sih），月娘掛置天邊，像一莢夠分e芎蕉，我足想欲伸手去給扎（at）落來，擘（peh）開它神秘e面紗，天頂 e月即呢 a光，無的確，卡等咧會凍看著日出。

我雄雄狂狂牽著o-to-bai，騎對海邊仔去，天色猶暗暗，遠遠（huinn7 huinn7））看著幾偌仙人影，徛置橋頭頂teh做運動，做伙teh開講，路邊亦有幾個 a阿婆仔，早早著出來the散步囉，亦有幾隻狗仔，仆置路中央the睏。我借著路燈e光，順著河岸頂騎去，隘隘 e路面，兩爿是陷井，正爿是河川，倒爿是歸片 e塍園，歸個灞岸彎彎曲曲，歸條路長軂（lo）so，才有三葩（pha）路燈。有一截路，路邊 e草仔枝，發到真長閣大欉，幔（moa）過來路面，四邊恬生生（tiam chhin chhin），看起來誠暗鬖（sam）。o-to-bai e速度，我著愈（na）騎愈慢落來，按呢比較（kauh）較（khah）安全，較免驚會跋對崁仔底，毋過驚鬼 e我，不時著會腳手肉怌怌（phi phi chhoah）。o-to-bai 若是騎緊，車燈 e光，免驚無看著路，毋過我騎車e技術bai2 ，假使若騎對港底落去，無人通來給我救起來，若按呢，我厝內底 e大囝細囝，毋著------，抑是較細膩咧。

來到海邊仔 e沙埔仔，我徛（khia）趈（tam）龜山 e正面，遠遠看著幾十台 e船隻，閃閃熠熠，掠魚討海人半暝仔著已經出海去，海湧溢過來閣拺（sak）過去，天星漸漸消失置天頂，月娘亦漸漸變成柳葉眉。目睭前 e船隻媛媛也（un un a）消失置我看會著 e海面。海鳥飛過我 e面前，天邊一片白霧紅。黑色 e海湧，亦漸漸變白霧光。沙埔仔頂 e沙馬仔囝，無雄無狂，消遙自在，滯置遐the挖沙 （chhoe）物件食。干那龜山島猶恬恬倳（chhai）置遐未震動。當東月眉消失 e時，亦著是日頭暴（pok）出來 e時。一粒紅pha pha e 日頭，一分一秒媛媛也徒（soa）對天頂去，一目 （nih）著變成一粒白皪皪（lek）e 璇石，照佇海上，形成一條金熠熠e水路，給大海分做兩爿。

日頭光媛媛也向四周圍湠（thoa）開，照著海面，目（bak）前一片 e光茫，我無目，恬恬欣賞日出 e 千變萬化。即個時陣，日頭足鑿（chhah）目 e，我 e目睭前浮出兩粒日頭影，目睭強欲搌（thian）未金，看對大海，宛如一寡碎碎 e金仔，掖（ia）置歸遍e海面。