四兩ng2仔無除

海翁台語文文學 第九期 2002/06/01


四兩ng2仔無除　　陳玉華稿91/03/20


來夠即个世界，已經是第六日矣，我兮主儂，自共我買（bue2）轉（duinn3）來了後，著共我囥入去一跤樵細跤仔兮紙箱仔底，我知影日頭是對東爿出來唉，唯西爿落山去。雖然我是一隻頭牲（senn）仔，呣佫，我足希望會當出去看外口兮世界，一工過了一工，我身軀（hun su）頂兮雞毛，已經漸漸互我兮同類，鵝（go5）仔佮鴨仔饕去，我足想卜脫離即兮所在，我下性命（senn3）唯頂懸一直爬，我展開兩支翼股，一直一直挖（iah4），著是無法度踏出圍，我是一隻雞（ke）仔囝；當像鳥仔仝款飛（pue）佇天頂，干礁會當踞佇邊也歇喘，我日夜祈禱，期待我兮主儂，會當伸出伊迄支手，共我捧出去看外口兮世界。


早起，日頭斜唯厝內底入來，我聽主儂兮跤步聲，漸漸行倚來，看伊拍開紙箱仔，我歡喜甲一直蹤，掠準主儂卜放我出去矣，可惜伊干礁拈一把飼料，佮一 （khat4）水囥佇鴨槽內，我足失望兮，時間一分一秒一直過，無耐兮等待，叫我卜如何是好。


佫夠中晝矣，阮主儂兮良心則發現，即共阮放出籠。即時阮足歡喜，蹤對主儂一手栽種兮菜股園（huinn5）仔，雖然即塊菜股園仔，恰無七尺長、三尺闊，卻是阮期待誠久兮天地，我兮同類，已經將菜園仔睡（thuun2）踏做平地，主儂辛辛苦苦所種兮大同仔，亦互饕甲申一半，我都抑hinn2哼著咧，著看一隻一隻，跳落去水堀仔泅水，那真心適，我一句都無講嘛綴落，當我半浮半沉兮時，我則意識著；家己只不過是一隻雞仔囝。




我展開兩支翼股，拽祭拽祭，雙跤佇水底那摀（thut4）那捸（lut4），身軀（hun su）頂兮雞毛攏齊澹，無情兮冷水一直嗆唯我兮鼻空內，我強卜塞喟，我喙仔開開，一直哀叫，一直咧喝咻。啾！啾！啾！救儂哦！有啥會當來救我兮命咧！我呣甘願安爾，著來向命運來頕（tong3）頭，我用我最後兮一口氣，捸唯岸邊，翼援佇磚仔頂，規身軀懼懼顫（gi7 gi7 tsun），我手酸（suinn）跤酸，對眼前兮一切，茫茫渺渺。


佇半醒半眠兮情形，我意識著阮主儂，伸手落去水堀仔，緊共我捊倒起，用衛生紙包佇我兮身軀頂，替我共身軀頂兮水吸（so2）掉，則佫摕吹風機遠遠對吹，吹礁了後共我匟店塗跤兜，我一支雞跤煞溫落，徛直，歸身軟（luinn2）趖趖強卜死，了後阮主儂，佫摕破布仔來共我掩乎燒，過真（tsi2）久了後，我即漸漸回復意識。




呣拘，我受著足大兮驚惶佮風寒，我已經失去了原本兮信心佮嬌傲。我每工只會當勼佇箱仔角，等待死亡兮來臨。