福是禍，是禍閃袂過 車禍（三）

是福是禍，是禍閃袂過　　　陳玉華 97/12/22


　

車禍（三） 　


　　　　　　　　　　　　　　　　


有一著有兩

有兩著有三

無三不成禮



三擺車禍死無去

周公鬥法無了時

平時家己無張持

即會一期閣一期



今年拄好四十九

做完生日著下斗

額頭也拄khok一包

鼻仔無傷真正爻



透早載女上車頭

青燈直行到路口

阿哥紅燈做對頭

袂赴握擋摔落猴



哀哉車速無三十

兩頂帽仔做伙落

車倒壓人人坦覆

破皮擦傷肉袂合



後坐查囝無出聲

掠準摔死已無命

斡頭看伊爬起行

只是心頭著一驚



阿哥透早撞紅燈

喊我著愛好心幸

講伊無錢無背景

唔通叫警來出庭



阿哥歲數一大把

講伊散赤無傢伙

母女平安著好勢

莫叫警察來夯伽



講起實在誠無體

無留姓名無留話

尻川pueh pueh一直花

車歹唔通叫伊賠



時間看看強袂赴

車牽發動上市區

花花煞煞家己付

人生在世無外久



一二三五無寫四

何必強權又奪利

莫管他人的過失

自由自在尚稀奇



若是欲愛心頭定

著愛揣儂來收驚

別儂好意著愛聽

紅包準備著愛行



女中鐵牛九十一

收驚提錢隨汝意

畫符收驚無代誌

包汝返去食百二