虎頭蜂鑿跤胴 --------陳玉華 100/09/27

虎頭蜂鑿跤胴 --------陳玉華 100/09/27



校園樹跤虎頭蜂,

飛懸飛下鑽褲縫,

一支針筒鑿跤胴,

皮肉踵帳又閣紅,

害我疼甲跤袂動,

只好大聲喝救人,

掛號排隊卡允當,

三支射筒好叮噹.

風颱天 --------------撰稿：廖秋瑜

風颱天　演講：林立楷 閩南語演說第五名
　　　　　　　　　　　　　指導 : 高鏡清 老師
撰稿：廖秋瑜
　　　　　　　　　　　　　　　　　　　　　　　　翻譯：陳玉華
各位評判、來賓逐家好，我今仔日欲演講的題目是：『風颱天』。
夯頭向天，原本一片清朗的雲彩，一時仔久，煞變甲黑陰暗地，氣象局網路，有寫「風颱來襲」的標題，予我驚一趒，趕緊通知厝內的人，這個天大地大的消息。
　　為預防風颱所發生的災害，我佮阿爸鬥陣用黏布仔共窗仔黏稠咧，共水溝清清氣，了後全家往超級市場購買物品，賣場內早著人擠人熱鬧滾滾，阮買青菜、水果、餅、泡麵，以備不時的需要。
　　暗暝窗門外，風雨聲呼呼叫響無停，房屋好親像鑽入洗車的隧道、予大水用力沖洗仝款；路邊的大欉樹搖上搖落，大滴的雨水拍佇玻璃像瀑布仝款siang3落來，突然間失電，四箍輪轉黑嘛嘛，伸手不見五指(tsainn2)，阮真細膩真小心咧點蠟燭火，歸家圍佇微微的火光跤，逐家難得有機會做伙塊開講講笑詼、唱歌撈曲，雖然是一個無燈火的暗暝，阮也共同渡過一個溫暖的時刻。暝半，我聽外面風颱呼呼叫的聲，驚甲歸暝攏袂睏tih，聽見阿爸阿母佇厝內，蹤來蹤去的跤步聲，著暗暗仔祈禱，祈禱風颱趕緊離開，阿姊看著我翻來翻去，輕輕的搭我的kha脊phiann，安慰我毋通擔心煩惱。
　　隔轉工透早，台電人員將被拍斷的電火柱仔修理理唉，已經漸漸恢復原本的面貌，風颱也減弱，我對窗門口看，哇！歸塗跤li- li- khok- khok的物件落甲滿街路，有招牌、玻璃碎片，樹椏樹欉、電火柱仔也歸欉予風颱拍斷，搧甲東倒西歪，對面公園也亂七八槽毋成樣真狼狽。風颱過了阮趕緊拍開電視來看，新聞報導各地方的災情，有真濟人因為風颱而來受傷、死亡，嘛有人的家園、田園被土石流埋入，我想，假使每一個人攏會來注意安全，著袂遐呢濟的意外發生。
　　看著新聞，予我想著阿公阿媽，怹的狀況毋知啥款，阿爸立刻敲電話共怹問安，阿公講：「人攏真平安，只是厝內有淡薄仔淹水，而且山頂發生了土石流，有一戶農舍予土石流共埋去。」我替怹流凊汗，嘛替怹歡喜平安無事，謝天謝地謝鱟hia佮飯籬le7。
　　風颱過境了後，阮全家伙同心協力的同齊清理糞圾、玻璃屑仔、樹椏雜枝，予家恢復原來的面貌，彼種的感覺真正是清爽、四適。厝邊頭尾踏出門，互相關懷問好，做伙協助拚掃社區。人講：『隔壁有事咱著行，厝邊較好咱親情(tsiann5)』。
天災地變是無法避免的，但是咱如果佇平時著做好水土保持的空課，佇風颱來襲進前，便會凍做好萬全的防颱措施，俗語講：『樹頭若徛予在，毋驚樹尾做風颱』。傷害自然著會來降低，除了這以外，咱也應該抱持著感恩惜福的想法，感謝遐必須佇大風大湧的風颱天，恬恬守護佮拍拚的人，予咱會凍平安渡過天災來襲。我今仔日的演講著到遮多謝逐家。 (9９５字)

台語蓋趣味 修稿：陳玉華99/03/02

台語蓋趣味 修稿：陳玉華99/03/02



各位評判、來賓逐家好，我欲演講的題目是：『台語蓋趣味』。

台語課的時，老師攏叫阮『身軀坐正正才會得人庝』，我有坐正正認真聽。但是我若像『鴨仔聽雷聽攏無』。阮阿母是外省囡仔，阿爸顧賺錢攏無陪阮講台語，我著無法度陪阿公阿媽開講，真可惜。我讀小學三年的時，阮導師派我參加台語訓練班，學台語通好對外台語演講比賽。所以我著利用睏眠的時間，走去練台語演講， 阮台語 老師有講過，只要有心學自然著學會。

頂暫仔阮導師講欲撿一個查埔學生，佮一個查某女生，看啥較爻念台語，我竟然輸給彼位同學，我真毋願，後擺比賽一定欲贏伊。過了一暫仔，導師又閣講我念的有懸有低，阮兩個是平手！而且阮班的同學，抑會教導師念台語。今嘛的少年囡仔，攏無咧講台語，所以我放學轉去，攏會教阿母念台語，伊有時也會問我茲句欲按怎講，阮阿母的台語能力，今嘛佮我差不多矣！

有真濟人感覺講台語真困難，閣粗俗song5壁壁。若是有彼種觀念的人攏錯了！學台語其實真簡單，若像『貓鼠無洗身軀-----趣味』。台語有七音八調，只要慣勢講，『捷講喙會順，捷做手袂鈍』，愈講愈順口，『做人著認真，做事著頂真』，免外久汝著會曉講會曉寫，到時佮我仝款，有機會來參加台語演講比賽，抑是教爸母講台語，煩勢未來嘛是一位真出名的台語老師，抑是台語評審委員呢！

我學會曉講台語，佮阿公阿媽較有話講，我會曉講台語，攏是阿媽佮台語老師的功勞，我會凍店遮參加台語演講比賽，攏是受怹的教導，怹予我了解講台語蓋趣味、蓋心適、蓋文雅、蓋高尚。怹共我講，台灣俗諺語、佮歇後語攏是教導世間人，做人處事的要領。假使將來有機會，我欲做一位台語老師，抑是一位台語評審委員。我的演講到遮多謝逐家。（681字）

呂子傑--------爸爸媽媽的辛苦 撰稿：呂子杰99/03/03

呂子傑--------爸爸媽媽的辛苦 撰稿：呂子杰99/03/03

修稿：陳玉華



各位評審、來賓逐家好，我欲演講的題目是：『爸爸媽媽的辛苦』。

平時阮阿爸阿母，攏真骨力咧扑拚事業，雖然講怹逐工辛苦做生理，對透早無閒到半暝，連假日嘛袂當休睏，更加袂當陪阮耍，毋過阿爸阿母，抑是『歡喜做甘願受』，一點仔叨無怨言，怹講：「辦桌做刀籽的工作辛苦，生意嘛無講會好，咱日日見財，有利潤通好趁，生活著無問題囉，若摸到錢心菲著開，袂艱苦啦」。

可是阮阿爸的手攏予飯菜湯燙傷，抑是無細貳予刀割傷。伊閣講:「阿爸是一個毋讀冊的青暝牛，旦才來做苦力、粗重、閣燒烘烘的灶跤空課路。乖囝矣，汝佮恁小妹兩個，著愛好好矣認真讀冊知道理喔?」其實我嘛知影阮兄妹真賤，定定惹禍端，阿母講過:『做人萬項事著謹慎，凡事攏愛三思而後行』，才袂出錯』。

毋閣有一工，店裡來真濟顧客，我著鬥幫捧飯菜，每桌攏有人客，有的人客較無耐性等，擋袂稠著一直催：『頭家啊，菜旦是煮好矣抑沒?』嘛有人無想欲閣等落，著離開店口行出去。彼工小妹運無好，阿母叫伊向落桌仔跤，提哈密瓜出來切盤。小妹旦起身轉頭，嗆事阿母捧菜湯欲予人客食，兩人煞碰碰做一伙，小妹的面、肩胛、手，攏有予燒湯淋著，阿母看著毋甘呿呿目屎流落，責怪家自無路用，阿爸講：『仙人扑鼓有時錯，跤步踏差啥人無』，緊載小妹送急診治療較要緊。

後來人客攏吃飽轉去，阮才開始收垃圾、擦桌仔、掃塗跤、洗碗盤，本以為袂閣有顧客，真晚矣閣來了一寡人客，最後，無閒的一工總算結束囉，我佮阿母才閣洗碗，洗到翻點才洗完。轉到厝，阿爸阿媽抑是著閣去放水，阿爸去雞籠掠雞仔，我佮小妹準備衫褲洗溫身，準備休睏好好矣睏一醒。看著阿爸阿母辛苦咧做事業照顧阮，等有一工我若大漢的時，我嘛欲好好孝順怹，。我的演講講到遮，多謝逐家。 （702字）

春天的腳步--------撰稿：張 議 100/02/17 修稿：陳玉華 100/02/17

春天的腳步--------撰稿：張 議 100/02/17 修稿：陳玉華 100/02/17



各位評審、來賓逐家好，我今仔日欲演講的題目是：『春天的腳步』，『春天的腳步』。

盼望，期待，春天的腳步，一步仔一步仔，逗逗仔的行出來矣，

大地就親像有了新的生命仝一款，幼幼的草仔枝，偷偷仔對土底鑽出來矣，光溜秀的樹木也長新芽，青翠的山野，使原本一片拋荒的大地重現生機，為大地增添染多采多姿的光彩。

班芝樹、山櫻花、桃花、梨花、杜鵑花，野花遍地，唔管是有學名的抑是無學名的；攏散播置草仔埔頂。春天的花蕊隨風飄動，春風一吹來，著會凍鼻著一陣又閣一陣的花芳味。大細隻的蜜蜂佮蝴蝶，飛過來又閣飛過去，無閒tshih tshih置咧採花蜜。

春天一到，家家戶戶的大大細細， 攏像『春天的蜜蜂――閒袂稠』，個個攏精神飽滿，攏出來活動筋骨，各人做各人的代誌。囡仔兄、囡仔姊，一人牽一線，將風吹放上天頂，嘰嘰喳喳的笑聲，鬧熱滾滾。風吹的花樣百百款，置天頂飛來飛去，有時纏置樹仔頂，増加了一份春天的美景。我希望一年四季攏像春天仝一樣，日日春。

人講：「一日之計在於晨，一年之計在於春，一生之計在於勤」。春天，是歲月的起始。我欲用全新的自己，帶著希望的春天，我欲將冬季蘊藏的能量，跤步踏開勇往直前向前行，在新的春天來到的時，來達成家己的目標，我的演講講到遮，多謝逐家。 （509字）

春天的腳步 撰稿：陳玉華 演講:陳彥廷

春天的腳步 撰稿：陳玉華 演講:陳彥廷

各位評審、來賓逐家好，我欲演講的題目是：『春天的腳步』。


『立春落水透清明，一日落水一日晴』，立春一到，寒死死的冬天，著欲來結束囉，春天若來到，大地的萬物，就親像有了新的生命仝一款，礁鬆的草仔枝，光溜秀的樹木也重新發新芽，青翠的山野，櫻花、杜鵑花、紅花、白花姷閣芳，茲時『春天的蜜蜂――閒袂稠』飛上飛入置咧採花蜜。蝴蝶佮鳥隻也飛過來又閣飛過去，野鳥啾~啾~啾.


置宜蘭三星地區的泰雅路段，兩爿的山櫻花一蕊一蕊隨風飄動，落滿了滿樹跤，幼幼的草仔枝，蠔虫也偷偷仔探頭，春天的花季美景，吸引了無數的遊客，隨個精神飽滿，上山頂遊賞百花。阮全家伙仔，趁二二八三工的假期，日頭赤炎炎，『輸人毋輸陣』，嘛上山野活動筋骨，看著春天的花季美景，阮歸身tsiau輕鬆，精神真清爽。山頂的遊客嘰嘰喳喳的笑聲，歡樂的氣氛，鬧熱滾滾。

俗語講：『清明田　穀雨豆』。春天一到，也著是作穡人開始耕作的時候。農民也褪赤跤畢褲跤，投入農業生產，犁田機一駛入去一區一區的水田底，田土一phang2，隨會凍看著犁田機的後壁面，綴著一群白鷺鷥，店田底走來走去咧揣食，有時閣會跤縮縮，徛店田底休睏。

茲當陣田園也插滿了青籠籠的水稻，寂靜無聲的田園，三星的蔥仔田，春風一吹發出一陣一陣的蔥仔芳，鼻著蔥仔的芳味，無數的遊客，跤步擋恬，停落來排隊買蔥油餅，大儂佮囡仔儂食甲歸喙箍油濾濾。人講「三星蔥仔姷閣芳，青青長長白蔥蔥，做一冬挺賺三冬，若嫁種蔥吃勿會空」。

「春天後母面」，春天天氣多變，著像後母的面色，講變著變。一到下半晡隨起風，好加在阮有tsah裘仔，袂冷著。我的演講講到遮，多謝逐家。

爸爸媽媽的辛苦 撰稿：林欣茹99/03/01 修稿：陳玉華

爸爸媽媽的辛苦 撰稿：林欣茹99/03/01 修稿：陳玉華


各位評審先生、來賓逐家好，我今仔日欲講的題目是『爸爸媽媽的辛苦』，『爸爸媽媽的辛苦』。

我的阿爸因為欲晟養阮，平時傷過操勞，置舊年致著病症，已經過身矣，無置茲個世間，今嘛，阮厝內底只偆阿母、小弟佮我，三個人相依為命，晟養阮姊弟矣的重擔，著落在阿母伊一個人的肩胛頭。阿母一年通天，讓時無讓日，扑拼咧賺錢做空課，目的著是欲予我佮小弟過閣卡好的日子。

置熱天時，別人的爸母攏會娶囡仔，去海邊矣掠沙馬矣、耍水、抑是足百山做休閒活動。甘那阮阿母為著生活，逐工攏愛屈店置，像火爐的灶跤咧煮飯菜，毋管是透中晝日頭赤炎炎，抑是落雨暝，嘛愛替顧客送便當。置寒天時，我好朋友的爸母，攏會娶怹去燒水溝泡溫泉、踅夜市，放鬆自己過日子。也只有阮阿母，愛用冰冷的水來幫人洗碗箸賺錢，我問阿母伊，歸年通天咧做咧賺錢甘袂忝，阿母講：『為著腹肚，甘願食苦。咱今日賺錢為生活，無錢著食砂。咱愛將食苦當做食補，卡好過日，咱歡喜做甘願受，毋通歸工怨天怨地』。我知影阿母伊逐工做空課，無閒chih chih蹤出蹤入，真辛苦咧晟養阮。所以阮並無要求伊娶阮姊弟矣去迫迌。




有一擺我感冒又閣吐又閣漏，阮阿母趕緊娶我去病院看診，無暝無日咧照顧我，半夜矣三不五時，起來共我蓋棉被，阮阿母每工除了愛照顧我佮小弟以外，閣愛做空課賺錢真辛苦，予我感覺真痛心。我佮小弟下定決心欲好好矣讀冊，好好矣做人，才袂辜負阿母的向望，阮欲用感恩的心來感謝阮的阿母，給伊講一聲：『阿母感謝汝，有妳置咧真好』。將來大漢了後，阮欲好好矣照顧阿母汝，假使將來阮若有成樣，嘛欲好好矣貢獻社會。我的演講講到遮,多謝逐家。 （655字）

愛護美麗好臺灣撰稿：何奕儒 修稿：陳玉華

愛護美麗好臺灣撰稿：何奕儒 修稿：陳玉華

第三屆台大校友盃國語相聲暨閩南語說故事講笑話 佳作
各位評審先生、來賓大家好，我今仔日要講的故事是『愛護美麗好臺灣』，『愛護美麗好臺灣』。

首先我來紹介咱臺灣美麗的寶島，大海闊闊，山明水秀，花芳水甜，冬暖夏涼，四季如春，每一個季節攏有無仝的景象。一年的開始著是對充滿生機的春天講起，春風微微仔吹，春天樹枝

那是置熱天，樹阿頂的蟬歸日叫無停，草仔埔各種的蟲仔聲、田蛙仔嘓嘓叫、蜜蜂採花蜜嗡嗡嗡，好親像置咧開音樂會仝款鬧熱滾滾。閣有每一種的水果是甜甲會生蚼蟻，就像「新埔椪柑—尚好」。

秋天的風著像一個愛耍的囡仔，將楓仔樹的樹葉仔，染甲紅紅紅紅，又閣將樹葉籽掖甲一四界，真正是有夠

冬天的梅花，像十七、八歲的小姑娘，妖嬌閣美麗。白白的霜雪，對天頂飛落來，替怹披上一領雪白的禮服。大人佮囡仔歡喜置合歡山咧玩雪。

毋過因為有一寡人，毋知啊通珍惜，不但垃圾亂撣，而且看到美麗的花蕊，著隨意將它挽落來。還有一寡人佇山坡地亂種檳榔，也有人過度開發起别墅﹔將釘土的樹根、樹木攏砍掉，被砍掉的樹木，根會挽住土石，落雨的時，水會對土底流落去。無親像現在土石鬆鬆，風颱一到，水無塊流，著對山頂上頭直接沖落去到山跤，連土石含樹木同齊流下去，造成足帶置山跤的房屋住戶，被土石淹蓋介危險。像去年「莫拉克風颱」時，台東的知本溫火燒罟寮全無望，擔沙填海了戇工』，現主時，毋旦看袂著美麗的風景，嘛聽袂著鳥仔的叫聲，佮囡仔嬉鬧的笑聲。

俗語講：『厝驚無穩，人驚忘本』，咱愛守護祖先的恩賜，好好保護咱的地球，人講『樹頭若徛有在，毋驚樹尾做風颱』所以咱愛做好水土保持，佮大自然共同生存，大家做伙來建造台灣，才袂閣再有靴濟危險的災害發生，予咱囝孫過著幸福的日子。臺灣美麗好所在，四季如春真正讚。水土保持要做好，山崩地裂袂閣來。糞圾分類毋通放，毋通放，囝孫歡喜又安全，又安全。我的故事講到這，多謝大家。