我上佮意的風景區----學生演講稿 1

我上佮（kah）意的風景區 演講：楊雅靜
（指導）撰稿：王美珠
修稿：陳玉華

各位老師、各位小朋友，逐家好，逐家平安無煩惱。 我是第 號，我欲講的題目是：我上佮（kah）意的風景區。宜蘭人尚幸福，會凍店好山、好水、風景好的好所在，外縣市的人總嘛羨慕咱有這麼好的環境，怹定定利用假日過來宜蘭七迌，暫時將生活壓力放一邊，心情共伊放乎開，來感受大自然的滋味。
若是說宜蘭的風景區，不是我在臭彈，說三天三暝嘛說沒煞，不過我可以介紹我上佮意的風景區給大家知。宜蘭有一個倚山玩水，空氣新鮮閣可以露營、烤肉、踏腳踏車的好所在，這個所在就是武荖坑，宜蘭俗語講：『武荖坑大石鼓；阿兼m城仔水查某』，聽這句話就知樣武荖坑好地理，好風水。
會記得小漢的時，阿爸、阿母時常帶我去武荖坑玩，邊仔有一條新城溪，溪仔水冰擱涼，阿爸跟我在溪底抓石擔仔，阿母在樹仔下出報紙傳吃的；落尾仔卡大漢學校班親會嘛選武荖坑做活動的所在，大人在溪岸邊烤肉開講，囡仔在溪底玩水抓毛蟹、苦花、溪哥仔，玩甲肚子餓就起來岸上吃東西，吃飽肚重就在草埔打球，跑相追，晚時仔在武荖坑搭棚仔過晚，躺在草埔仔上看光焱焱的月娘，想到這讓我足懷念小漢無煩無勞的時，這攏是我對在武荖坑甲厝內的人、朋友、同學鬥陣難忘的回憶。
不是甘那阮愛去武荖坑七迌。親像逐年三、四月仔的「綠色博覽會」佮七月「宜蘭國際蘭雨節」，連宜蘭縣政府嘛愛選置武荖坑辦活動，攏會用不同款的主題來舉行，宜蘭縣的讀書囝仔每冬也會去那做校外教學，增加課本以外的知識，順紲趁機會將頭殻放乎空，心情放乎鬆，來這活動筋骨。
因為武荖坑水質好、空氣讚、停車擱方便，只要活動一開始攏會吸引勁多人來武荖坑七迌，一四界全全人，像今年裡面的設施有夠濟，精彩的表演是一个接一个，攤仔位攏是賣宜蘭在地產品，食的、耍的、用的逐項賣。剉冰、壽司、臭豆腐；燒的、冷的攏總有；「三步一崁店」，攏免驚去餓著。抑有臆題遊戲，大家『有食閣有掠』，攏耍kah勁歡喜。有的人玩一天玩不夠，惦宜蘭過夜過轉天繼續玩來鬥，生理人嘴笑目笑，口袋仔裝甲飽飽飽。
武荖坑真正是一個勁讚的風景區，不管是家庭旅行還是大型活動，攏可以讓人去過了後，擱想要去的一個好所在。希望大家鬥宣傳，讓擱卡多的人可以來武荖坑七迌。
我的演講說到這，最後祝福大家，身體健康，萬事如意，多謝！