有捨著有得

島鄉台語文學 第25號 2001/12/31



有捨著有得


五月三號迄一工，阮（guan2）照約束扑透早8:00自強車班，卜上台北簽訂讓渡書。坐佇火（hue2）車頂目向窗外，窗外落著霎霎仔雨，玻璃窗予雨噴甲霧siak2 siak2，阮 e目睭嘛起煙霧，仝款 e景緻卻是無仝 e心情。白茫茫 e視線，看袂清優美 e景色，哀怨e 憂愁，難捨鬱卒 e心情，心肝底感覺足無奈，阮綴著火車　e起磅芛芛歪歪，一時煞無法度來平靜落來。

行佇熟識e　景平路口，窄窄ｅ車道，車輛挨挨陣陣，土粉仔颺颺飛，汽油味直嗆，阮頭暈目暗強卜擋袂稠，眼望路邊蘇起平土地代書（si）e　看板，心頭e　呼吸更加急躁，窄窄e　樓梯直趟二樓，跤若跨過一坎心頭著疼一下。見著林先生即對翁仔某（tsia2），佮迄對古錐e 姊（tsi2）妹仔，感慨人生本是無常客。佇代書e 見證之下，阮簽下賣厝e 讓渡書。佇代書e 陪同之下，還掉壹佰萬e貸款，即種決定可抵心頭鬱卒佮憂慮。

倒轉e 路上，窗外e 山林看起來愈青焟(tshunn chiorh)，無風無湧e 海洋愈恬靜，阮e 心嘛已經綴它平靜落來。連續幾畷（jua7）宜蘭、台北e 奔波，總算了有一個交待。

七月廿六號簽下買厝e 合約書，遮是一間十七年久e 透天厝，阮無講真甲意，阮有一點仔後悔，唔閣厝款都予人矣，欲（bue3）後悔嘛傷慢矣。佇嵐峰路頂，車道彎彎曲曲，伸出來e 迄間厝，壁邊有兩跤電桶，壁尖尖凹凹，若是對進士路斡倒入

來，車速緊，好親像一支刀利劍劍，插入心肝芛仔斬斷情絲。路面佮員山鄉相隔界，頭前猶閣是田園，若給大門（buinn5）扑開，就會凍看著一抱草垺(bu5)，有時猶會凍看著幾隻白鴒鷥，歇佇田園（huinn5）咧啄虫仔，上樓台可遙望山林予一領白紗禮服網咧，行入灶跤扑開門窗，曠闊e 場地種了一欉一欉e 樹木(這是幼稚園e 後院)，顯現佇阮e 面前，雖然阮無奢華e 外表，卻是有一種樸實e 環境，來安慰心靈e 缺失。