3 演講稿---------食暗頓的時陣

食暗頓的時陣 五忠 李 晉 撰稿

陳玉華 修稿


各位評判先生逐家好,我今仔日欲演講的題目是[食暗頓的時陣],[食暗頓的時陣],日頭漸漸落山去,鳥隻一群一群也飛轉巢內歇睏,已經到黃昏時刻囉,逐家攏倒轉家己厝裡,我行置路頂,聞著街頭巷尾一陣一陣炒菜的芳味,家家戶戶攏開始[弄鼎弄灶],我趕緊行轉去厝內,毋知阮阿母今仔日會攢啥乜好料的菜.

行到阮兜門跤口,著鼻著芳貢貢,貢貢芳的味,趕緊走入灶跤探頭看覓,阿母即炒第一盤菜爾爾,想袂到第一盤菜著即芳,可見阮阿母是外爻煮菜,茲個時陣是阮兜灶跤最介無閒,阿母看我轉來,著叫我鬥撿菜,洗菜.切菜,我真歡喜會凍給阿母鬥相仝,過無外久,我著共阿母交待我的穡頭做好,阿母趕緊共切好的菜底匟入鼎底炒,加一點仔配料,又閣炒出一道可口美味的菜.過一時仔久,阿母將飯菜煮好勢,逐家早著枵甲腹肚咕咕叫,[大腸划小腸],攏走去貯飯食,食甲津津有味,逐家一直呵咾講:阿母煮的菜有夠好食,阮是[三頓五味,四碟一碗湯]真豐派,有紅燒獅仔頭,清涼退火的菜瓜.鹹閣芳的菜晡蛋,這攏是阿母的手落菜,毋管是味,抑是芳氣攏袂輸外面餐廳,過無外久盤仔底的菜攏掃空空,我的喙角稠一粒飯粒,阿媽講我帶便當,阿公講碗底愛撥清氣,後擺大漢即袂娶貓仔某,糧食是做田人辛苦的耕作,[一粒米,一粒汗],袂凍拍損,

「民以食為天,食以安為先」,可見食對咱日常生活中佔真重要的地位.除了[食飽也愛食巧],三頓溫飽以外也愛講求扑算食卡精緻,阮阿母最甲意研究食譜.定定提實驗品予阮試食,有一擺試驗失敗,結果害我落屎三工即好,我真想欲封阮阿母為食神,希望阿母會凍逐工煮紅燒獅仔頭予阮食,因為暗頓食紅燒獅仔頭,加足會落飯,暗頓也會凍講是一工的活力,精神的來源,食暗頓的時光,是阮一家伙仔享受天倫之樂的時刻,會凍予阮閣卡親近,食飯飽了後,阮歸口灶會做伙看電視,開講,聽阿公阿媽講:[食果子拜樹頭，食飯米敬鋤頭,這是咱做人愛知的道理.我的演講到遮多謝逐家.