9 學生演講稿-------對一條新聞講起

對一條新聞講起 　 陳玉華97/07/31



97年7月20日彼一工，宜蘭新聞中心，採訪記者賴福興報導，消防隊員真辛苦，除了救災，救難以外，有時也愛掠毒蛇，拆蜂窠，甚至愛臨時充做動物的奶母仔，畫面中彼隻貓咪一直叫，喵──喵──，著是19日彼暝九點左右，民眾置復興國中學校內撿到的，對牠的身長佮體重，會凍看出是拄出世無久的細隻貓仔囝，看著溫馴的細隻貓仔囝，置邊仔的女消防隊員，趕緊給飼水佮飼牛乳，毋閣細隻貓仔囝，仝款毋食毋喝，因此決定欲送往農業處動植物防疫所安置，宜蘭消防隊也呼籲民眾，假使發現拄出生無久的小動物，千萬毋通馬上將牠帶走，以免危及小動物的生命安全。

會記得舊年秋天，阮兜後尾，有一隻貓母生三隻誠古錐的貓仔囝，貓仔囝身軀頂的毛有灰的、也有黑的，每一工，貓母攏倒店厝尾頂乎貓仔囝食奶，一工食幾落擺奶，貓母一面乎囝吸奶，一面替牠的囝整理身軀頂的毛，貓仔囝吸奶吸飽了後，貓母著佮細隻貓仔囝耍走相趇，喙展到真大，大到會凍將對方的頭囥入喙內，因為厝尾頂有蓋鐵板，三隻貓仔囝置厝尾頂蹤來蹤去，戰來戰去的時，著發出乒乒乓乓的聲，唉！真正是『墓仔埔放炮──吵死人』，看牠母仔囝耍到真歡喜，我嘛真想欲加入牠的戰場，毋閣當我行倚去的時，貓仔囝隨蹤對貓母遐避風頭。　　　　　有時貓仔囝若唯厝尾頂摔落，塞置壁旁，足百壁足百勿會起，『和尚划船－無法度』啊，著一直叫，一直叫，喵──喵──喵──，叫出悽慘的聲，這時貓母著店頂頭回應，喵─────，行來行去真緊張，毋知欲按怎，『斑鳩吼－久久久（咕咕咕）』，了後，即將貓仔囝咬起來厝尾頂，這時貓仔囝真撒嬌，倒倚貓母身邊，貓母嘛真毋甘，用喙舌一直給甜，看著這幕乎我感覺真溫暖真感人，著想欲唱【天下的媽媽都是一樣的，哦！哦！天下的媽媽都是一樣的】。

毋閣過無外久，著聽勿會著嘛看勿會著貓仔囝，置厝尾頂蹤來蹤去，所發出乒乒乓乓的聲，因為有一早起，我發現十字路口，有一隻貓仔囝毋知啥乜時間已經乎車輾死置大路頭，『一二三,五六七,八九十--無寫四(無捨施,可憐)』，我心裡真艱苦，彼隻貓仔囝已經『gian 7 g ian7勿會消kian7』『 十七兩 翹翹』。置遮我嘛欲呼籲大眾，咱置馬路駛車嘛愛注意小動物的存在，嘿嘛是一條性命，咱愛提出咱的愛心，好好保護小動物。車咧駛的時，若看著動物衝出，著愛讓牠過，即勿會『一失足成千古恨』。