霸王雞

蓮蕉花台文雜誌（季刊）第十四期


霸王雞 　陳玉華作2002/04/01

頂一暫仔，有人送阮（guan2）兩隻雞（ke）仔囝，一隻公e5一隻母e5,公--e5 e5毛是金黃（uinn5）色號做小黃，抑母--e5 e5毛是黑e5號做小黑。阮佇土埕尾（bue2），種一欉菜瓜，彼兩隻雞，定定走去菜瓜棚腳，挖土chhoe7蟲食。你毋通看彼隻雞角仔無點，自掠來到即當陣，阮後生奇 （ting7），逐日著足無聊，手肚仁夯懸，手掌頭仔做嘴，佮彼隻雞角仔相啄，比一下你懸我低，到到手酸（suinn）為止，比煞，雞角仔著會走去土埕曝日頭歇喘，抑是跳上棚頂盹（dok4）眠，有當陣嘛真（tsi2）作孽，走去隔壁偷啄菜。

無聊時定定走來khu5門（buinn5）頭，一爿khu5一隻咧顧門，阮後生若下課倒轉（tuinn2）來，看無彼兩隻雞仔，著噴si si仔給呼，雞若聽著 si si仔聲隨走倚來，又閣展開一場e5決鬥，這遍奇 拍輸，手盤乎雞角仔啄一孔，手夯休戰牌，請待後回合。

講著彼隻雞角仔，實在是誠無情，無釆我提米咧飼伊，我會用講是伊e5主人，真正是目睭皮（phue5）無漿泔(am2)，我若對外面行倚來，去乎影著，伊e5頷頸著彎倒過，身軀（hun su）歪一爿，腳骨敧一爿，像毛蟹（hue7）行坦橫，過來給人啄腳盤，除了奇 以外，啥人e5腳若haN7上阮門前，隨過來給人啄，管汰你是阿公仔抑阿婆仔，大人抑囡仔嬰（enn），啥叫你踏入我門戶。


蓮蕉花台文雜誌（季刊）第十四期