欲按怎培養品德教育

欲按怎培養品德教育　　 撰稿：　林智傑 99/11/15

修稿： 陳玉華 99/11/16

　　

　阿土自細著無爸無母，伊佮阿媽生活，受阿媽晟養，阿媽一手擔起照顧阿土啊的生活，阿土的阿媽認真、扑拚咧做穡，想講欲予阿土佮人會凍比平，看會凍日後出頭天袂，毋閣阿土啊細漢的時著真頑孽，定定放火燒人的草垺，耍斷人的菜園，置學校 毋聽 老師的教訓，上課吵吵鬧鬧，真無規矩，歸工弄溜燃，到尾仔學校無去，閣毋揣頭路趁食，甘那知影共怹阿媽討錢過日，用錢像咧用水開真雄，無夠用的時著去共人搶錢，若無著是佮人冤家相扑，殺人放火，作惡多端，是一個十惡不赦的人，是社會的一尾毒虫，未滿十六歲，行警察局像咧行灶跤，一直無悔改，路尾著關入監獄內。假使阿土仔細漢的時，若有好的規範，好的規矩，好的人品，今日嘛袂跋落『萬丈深坑，無法自拔』，予人跤煉手煉，『一失足成千古恨』。



一個人的品德、人格，著愛對細漢培養，品德的教育是毋是有徹底建立，著愛看咱每一個人，是毋是有徹底來堅持教育佮實行。人的品德、人格教育是非常重要，但是一個人的品德、人格教育欲按怎來培養，每一個人的講法佮看法、做法攏無相仝。人一出世著受著爸母的晟養、教育。序大、長輩是咱頭一位老師，是咱頭一個模仿的對象。俗語講：『大隻狗爬牆，細隻狗看樣』，『上不正，下則歪』。置細漢的時，爸母除了晟養、教育囡仔以外，嘛愛做好模樣予囡仔看，家庭的教育是個人品德教育的基礎，一般來講，啥乜種序大著教出啥乜種子女，『教囝學泅，毋通教囝爬樹』，『嚴官府，出厚賊；嚴父母，出阿里不達』。



其次就是學校教育，學校的品德教育，老師除了愛以身作則以外，嘛愛有真善美的腹腸，來教育、引導、接受、教化佮輔導一寡較歹教示的囡仔。假使學校若無法度接受靴頑孽的學生，將頑孽的學生撣予社會，茲聲著害溜溜啊。



最後是社會教育。『人無照天理，天無照甲子』天理人道混亂，是非黑白顛倒。台灣茲幾年來社會及教育攏真亂。重重疊疊的犯罪事件，已經毋是用法治，有法度管的，這主要的原因，攏是公眾人物的言行與媒體的操作的動作。置社會徛起，欲予人來尊重，往往人的生活，應該愛有真濟行為的準則，愛有一支道德的尺。人是群居的動物，有家庭、有社會，這是互相對應，品德的教育袂當講一套做一套。社會品德教育是毋是會凍成功，是毋是會凍提升，著愛有耐心去感化，社會的和諧須要大家共同來維護。 我的故事講到遮，多謝大家。